अखेर महाराष्ट्रातील कोट्यवधी लोकांची मागणी झाली मान्य… – मराठीला मिळाला अभिजात भाषेचा दर्जा…

नवी दिल्ली :-कित्तेक वर्षांपासून मराठी भाषेला अभिजात दर्जा देण्यासाठी मागणी केली जात होती.अशातच केंद्र सरकारने मराठीला अभिजात भाषेचा दर्जा देण्याचा आज निर्णय घेतला आहे.मराठीला अभिजात भाषेचा दर्जा देत केंद्राने मराठीसह बंगाली,पाली,आसामी,प्राकृत या ५ भाषांना अभिजात भाषेचा दर्जा देण्याचा निर्णय घेतला आहे.

मराठी भाषेला अभिजात दर्जा देण्याचा निर्णय आज केंद्रीय मंत्रिमंडळाने घेतला.मी मा.पंतप्रधान नरेंद्र मोदीजी आणि केंद्रीय मंत्रिमंडळातील सर्व सन्माननीय मंत्र्यांचे महाराष्ट्रातील १२ कोटी जनतेच्या वतीने अतिशय मनापासून आभार मानतो.हा दिवस उजाडावा,यासाठी मी मुख्यमंत्री असताना आणि आताही मुख्यमंत्री एकनाथराव शिंदे यांच्या नेतृत्त्वात सातत्याने पाठपुरावा केला.लीळाचरित्र,ज्ञानेश्वरी, विवेकसिंधू अशा अनेक ग्रंथाचा आधार घेत मराठी भाषा ही अभिजातच आहे; हे सिद्ध करण्यासाठी अनेक थोरा-मोठ्यांचे,अभ्यासकांचे यासाठी हातभार लागले.असे उपमुख्यमंत्री देवेंद्र फडणवीस यांनी प्रतिक्रिया व्यक्त केली.

अभिजात भाषा हा वैशिष्ट्यपूर्ण भाषेला भारत सरकारद्वारे दिला जाणारा एक दर्जा आहे.हा दर्जा ज्या भाषांना दिला जातो त्या भाषेच्या सर्वांगीण विकासासाठी केंद्र सरकारकडून त्या-त्या राज्याला भरीव अनुदान मिळते.