अखेर निलंबित तहसीलदार पूर्वपदावर; महाराष्ट्र प्रशासकीय न्यायाधिकरणात दिलासा..

भंडारा :-अधिकार नसतानाही अकृषक जमिनीचे परवाने देण्यासह अन्य कारणाहून भंडाऱ्याच्या तहसीलदार विनिता लांजेवार यांना १० ऑक्टोंबर २०२४ रोजी निलंबित करण्यात आले होते.याप्रकरणी लांजेवार यांनी मॅट (महाराष्ट्र प्रशासकीय न्यायाधिकरण) मध्ये धाव घेत राज्य शासनाच्या आदेशाविरुद्ध दाद मागितली होती.यात मॅटमध्ये लांजेवार यांच्यावर लावण्यात आलेल्या आरोपात प्रथमदर्शनी तथ्य नसल्याचे समोर आले.मॅटने त्यांना दिलासा देत पुढील आदेशापर्यंत निलंबन आदेशावर स्थगिती’ देत भंडाऱ्याच्या तहसीलदार पदी रुजू होण्याचे आदेश दिले.कोणताही दंड न आकारता वाळूचे ट्रक सोडणे बेकायदेशीर कामे करणे,अशा आरोपांसह आमदार नरेंद्र भोंडेकर यांनी तहसीलदार लांजेवार यांच्याविरुद्ध तक्रार दाखल केली होती.यासंदर्भात महसूल वनविभागाने त्यांना चौकशीवरून निलंबित केले होते.यावर लांजेवार यांनी मॅटमध्ये दाद मागितली होती.त्यांनी दिलेल्या उत्तरादाखल,तहसीलदार भंडारा म्हणून लांजेवार यांनी प्रामाणिकपणे कर्तव्य बजावले आहे.

अवैध वाहतुकीतून त्यांनी ८१ लाख रुपये वसूल करीत राज्य शासनाला महसूल मिळवून दिला आहे.तसेच त्यांनी अन्य प्रकरणांत जमिनीचा कर आकारला असल्याचा अहवाल उपजिल्हाधिकाऱ्यांचा उपलब्ध आहे.सबब त्यांच्यावरील आरोपात अजिबात तथ्य नसल्याचा निर्वाळा मॅटने दिला.तसेच त्यांना भंडाऱ्याच्या तहसीलदारपदी रुजू होण्याचे आदेश दिले.