अखेर उद्या होणारा डॉक्टरांचा राज्यव्यापी संप मागे; आरोग्य सेवा राहणार सुरळीत..

उद्रेक न्युज वृत्त :-ठाणे जिल्ह्याच्या डोंबिवली येथील शास्त्रीनगर महानगरपालिकेच्या रुग्णालयातील डॉक्टरांना झालेल्या मारहाणीनंतर हल्ल्याच्या निषेधार्थ इंडियन मेडिकल असोसिएशन(IMA) महाराष्ट्र राज्य शाखेने राज्यव्यापी बंदची घोषणा केली होती.त्यानुसार, उद्या सोमवार २० जुलै २०२६ रोजी सकाळी ६ वाजेपासून ते मंगळवार,२१ जुलै २०२६ रोजी सकाळी ६ वाजेपर्यंत,असे २४ तास राज्यातील सर्व नियमित आरोग्य सेवा बंद ठेवण्याचा निर्णय घेण्यात आला होता.अश्यातच मुंबई उच्च न्यायालयाने मुख्य आरोपीचा जामीन रद्द केल्याने डॉक्टरांनी सदरचा संप मागे घेतला आहे.विशेष म्हणजे,प्रकरणातील मुख्य आरोपी रमेश म्हात्रे यांना जिल्हा व सत्र न्यायालयाकडून मिळालेला जामीन मुंबई उच्च न्यायालयाने रद्द केल्याने न्यायालयाच्या या निर्णयानंतर आयएमएच्या महत्त्वपूर्ण बैठकीत संप मागे घेण्याचा निर्णय एकमताने घेण्यात आला.कायद्याने आरोपीवर योग्य कारवाई होत असल्याचे पाहून डॉक्टरांनी सध्यातरी कामावर परतण्याचा निर्णय घेतला आहे.यामुळे रुग्णांना आणि आरोग्य व्यवस्थेला मोठा दिलासा मिळाला आहे.