उद्रेक न्युज वृत्त
चंद्रपूर :- शहरालगत घुग्घुस मार्गावरील एमआयडीसी परिसरातील स्टेट बँक ऑफ इंडिया शाखेत चोरट्यांनी लॉकर तोडून चाैदा लाख पळविले होते.याप्रकरणात दोन संशियत आरोपीांना पोलिसांनी अटक केली आहे.बँकेला सलग दाेन दिवस सुट्या असल्याच्या कालावधीत चोरीचा प्रकार घडला होता.बॅंक पूर्ववत सुरु झाल्यानंतर कर्मचाऱ्यांना लॉकर तोडलेले दिसले. चोरट्यांनी अनेक दिवसांपासून बॅंकेवर पाळत ठेवली होती.त्यामुळे सीसीटीव्ही फुटेजमध्ये दरोड्याची घटना येऊ नये,याची काळजी चोरट्यांनी घेतली होती.
त्यानंतर बँकेच्या इमारतीच्या खिडक्या तोडून आत प्रवेश केला आणि गॅस कटरने लॉकर तोडले होते. लॉकरमधील काही नोटा जळाल्या होत्या.बॅंकेतील सुरक्षा यंत्रणा सुरुवातील बंद केली असल्याने लॉकर गॅस कटरने कापले गेले व चौदा लाख रुपये घेऊन चोरटे पसार झाले.सीसीटीव्ही कॅमेऱ्याचे फुटेज संग्रहीत यंत्रणाही स्वतःसोबत घेऊन गेले.अखेर चार दिवसानंतर दोन आरोपींना पोलिसांनी शोधून काढले आहे. हे दाेघे चंद्रपूर शहरातीलच असल्याची माहिती आहे.बॅंक फोडी प्रकरणात आणखी काही आरोपींचा शोध पोलीस घेत आहेत.बॅंक परिसराच्या मार्गावर अनेक ठिकाणी सीसीटीव्ही कॅमेरे लागले आहेत. परिसरातील सीसीटीव्ही फुटेज पोलिसांनी तपासले. तेव्हा घटना घडल्यानंतर एक संशयास्पद वाहन या मार्गाने रात्री गेल्याचे समोर आले.चारचाकी वाहनाच्या समोरच्या काचेवर एक वाक्य लिहीले होते. हेच वाक्य पोलिसांना आरोपीपर्यंत घेवून गेले.सदर वाहनाचा पोलिसांनी शोध घेतला आणि पहिला आरोपी हाती लागला.त्यानंतर दुसऱ्याला अटक केली.दोन्ही अटकेतील आरोपी चुलत भाऊ आहेत.रक्कम मोठी असल्याने पोलीस सावधानतेने सर्व आरोपींचा शोध घेत आहेत.
