उद्रेक न्युज वृत्त
देसाईगंज(गडचिरोली) :- गडचिरोली जिल्ह्यातील देसाईगंज तालुक्याच्या शासकीय कार्यालयातील काही अधिकारी,कंत्राटदार यांच्याशी संगनमत करून विविध कामांतील फिफ्टी-फिफ्टीचा नवा फंडा वापरून “तुम्हारी चाल, हम मालामाल” अशी भूमिका सुरुवातीपासूनच बजावित असल्याने देसाईगंजच्या ‘त्या’ अधिकाऱ्याला फिफ्टी-फिफ्टीचा नवा फंडा चांगलाच भोवणार असल्याची खमंग चर्चा तालुक्यात दबक्या आवाजात सुरू आहे.
मिळालेल्या माहितीनुसार,कुणी कल्पनाही करूच शकणार नाही; अशी शक्कल ‘त्या’ अधिकाऱ्याने लढवून नवा फिफ्टी-फिफ्टीचा फंडा उदयास आणला आहे.नवीन उदयास आलेल्या फंड्यावर एक नजर टाकली तर ‘त्या’ अधिकाऱ्याने करोडो रुपयांची मोहमाया गोळा केल्याचे कळते.सुरू केलेल्या नव्या फंड्यात ‘ज्यांची बिलांवर वा इतर दस्तऐवजांवर सही अशांनाच मिळणार पाकीट रुपी दही’ असे बोलले जात आहे.फंडा वापरणारे वरिष्ठ अधिकारी असल्याने कनिष्ठ अधिकारी वा कर्मचारी चुप्पी साधून ‘तुम्ही कराल ती पूर्वदिशा’ असे सगळेजण ठरवू लागल्याने यामध्ये ‘नाही आडवी रेषा नाही उभी रेषा’ असा प्रकार हल्ली सुरू आहे.
सुरू असलेल्या सदरच्या फंड्यामुळे शासनाच्या कोट्यवधी रुपयांना चुना लावून कामांच्या निधीची राखरांगोळी केली जात आहे.कामाचा दर्जा,तांत्रिक बाबी,गुणवत्ता व इतर बाबी निकृष्ट दर्जाची करून केवळ आवक बघितली जात आहे.त्यामुळे सर्वांगीण विकास म्हण्यापेक्षा केवळ ‘आपलाच विकास अन् कामे भकास’ होत असल्याने यावर कुठेतरी आळा घालणे आवश्यक झाले आहे.अशा प्रकारांमुळे हल्ली आमरण उपोषण,ठिय्या आंदोलन,अन्नत्याग आंदोलन,धरणे आंदोलन व इतर आंदोलनाचा पवित्रा अनेकजण घेतांना दिसून येतात.तरीही मुर्दाळ प्रशासनास जाग केव्हा येणार? असा प्रश्न निर्माण झाला आहे.
