सर्वसामान्यांच्या खिशाला कात्री; घरगुती गॅसच्या किंमितीत वाढ; उद्यापासून नवे दर लागू…

नवी दिल्ली :-विधानसभा निवडणूक  कालावधीपासून आतापर्यंत व्यावसायिक गॅस सिलिंडर दराच्या किंमतीत सातत्याने कमी-जास्त वाढ होत होती.महिन्याच्या १ तारखेला कंपन्यांकडून गॅस सिलेंडरचे दर ठरविण्यात येतात. अशातच आता घरगुती गॅस वापरणाऱ्या सर्वसामान्यांच्या खिशाला कात्री लागणार आहे.केंद्रीय पेट्रोलियम मंत्री हरदीप सिंग पुरी यांनी आज,सोमवार ७ एप्रिलला निर्णय जारी करीत केंद्र सरकारच्या एलपीजी (लिक्विफाइड पेट्रोलियम गॅस) सिलेंडरच्या दरात वाढ केली आहे. एलपीजी सिलेंडरच्या घरगुती गॅस वापराच्या १४.२ किलो दरात ५० रुपयांची वाढ केली आहे.सदरचा निर्णय हा उज्ज्वला योजने अंतर्गत गॅस वापरकर्त्यांनाही लागू असणार आहे.सदरचे दर हे उद्या म्हणेजच मंगळवार ८ एप्रिल पासून लागू होणार आहेत.त्यामुळे उद्यापासून ५० रुपये अधिक किंमतीला गॅस सिलेंडर सर्वांना विकत घ्यावा लागणार आहे.

प्रधानमंत्री उज्ज्वला योजनेच्या लाभार्थ्यांसाठीच्या सिलेंडरची किंमत ही ५०० रुपयांवरून ५५० रुपये झाली आहे.तर इतर ग्राहकांसाठी सिलेंडरची किंमत ८०३ रुपयांवरून वाढून ८५३ रुपये झाली आहे.सदरच्या किंमती ह्या त्या-त्या स्थानिक क्षेत्रानुसार असणार आहेत.सरकारच्या या निर्णयामुळे गृहिणींचे बजेट बिघडणार आहे.घरगुती वापराचा गॅस सिलेंडरचे दर वाढवण्यासोबतच केंद्र सरकारने पेट्रोल आणि डिझेलवर उत्पादन शुल्क वाढवले.शुल्कात २ रुपये लीटर इतकी वाढ केली.मात्र,यामुळे पेट्रोल डिझेलचे दर वाढणार नाहीत.हा खर्च पेट्रोलियम कंपन्या करतील.पेट्रोल डिझेलवर वाढवण्यात आलेल्या उत्पादक शुल्काचा उद्देश हा ग्राहकांवर ओझे टाकण्याचा नाही,असेही मंत्री पुरी यांनी म्हटले आहे.