वाघोबाची झलक पहायची असेल तर किमान दोन महिने पाहावी लागणार वाट..

चंद्रपूर :-जगप्रसिद्ध असलेल्या ताडोबा व्याघ्र प्रकल्पातील वाघोबाची एक झलक पाहण्यासाठी देशभरातील वन्यप्रेमींसह विदेशी पर्यटकही आतूर असतात.मात्र,तुम्ही जर ताडोबातील वाघाचे दर्शन घेण्याचा बेत आखत असाल तर तुम्हाला किमान दोन महिने वाट पाहावी लागेल.कारण,फेब्रुवारीपर्यंतचे जंगल सफारीचे बुकिंग फुल्ल झाले आहे.मार्चमध्येच तुमचे ‘वेटिंग’ संपणार असून,त्यानंतर व्याघ्रदर्शनाचा मुहूर्त असणार आहे.

ताडोबाची जंगल सफारी केली की हमखास वाघ पाहायला मिळतोच.यामुळेच वन्यजीव प्रेमींसह पर्यटकांचा ओढा ताडोब्याकडे वाढला आहे.ताडोबा परिसरात राहण्याची उत्तम सुविधा उपलब्ध करून देणारे रिसॉर्ट या सोयींमुळे पर्यटकांची सर्वकाळ ताडोब्याला पसंती असते.सध्याच्या स्थितीत तर ताडोबासाठी जंगल सफारीचे बुकिंग मिळणे कठीण झाले आहे.येथील मोहर्ली,नवेगाव,कोलारा व पांगडी-झरी हे सर्व गेट (कोअर झोन) फेब्रुवारीपर्यंत हाऊसफुल्ल आहेत.मोहर्ली गेटवर मार्चनंतरही फक्त १० ते १५ टक्केच बुकिंग आहेत.नवेगाव गेटवर तर त्यापेक्षाही कमी फेऱ्या शिल्लक आहेत.त्यामुळे वेट अँड वाचची भूमिका असणार आहे.