वाघाच्या दहशतीत गावकरी भयभीत..!

गोंदिया :-जिल्ह्यातील देवरी,गोरेगाव आणि आमगाव तालुक्याच्या लागून असलेल्या सिमावर्ती भागात वाघाची दहशत असून आमगाव तालुक्यातील सोनेखारी ते येरमळा मार्गावरील घराबाहेरील गोठ्यात बांधून असलेल्या एका वासराची शिकार करून वाघाने जंगलाच्या दिशेने धूम ठोकल्याने परिसरातील नागरिक भयभीत झाले आहेत.घटनेची माहिती मिळताच वनपरिक्षेत्र अधिकारी आणि कर्मचाऱ्यांनी तात्काळ घटनास्थळी धाव घेतली.संपूर्ण परिसरात बंदोबस्त लावण्यात आला असून,वाघाच्या हालचालींवर पाळत ठेवण्यासाठी उपाययोजना केल्या जात आहेत.या परिसरात रोजगार हमी योजनेअंतर्गत कामे सुरू असतांनाच सदरची घटना घडल्यामुळे कामगारांमध्ये भीतीचे वातावरण निर्माण झाले. परिणामी,खबरदारीचा उपाय म्हणून रोजगार हमी योजनेची सर्व कामे तातडीने थांबविण्यात आली आहेत.वन्यप्राण्यांच्या प्रकारामुळे प्रशासन सतर्क झाले असून,गटविकास अधिकारी, ग्रामपंचायत सदस्य व इतर स्थानिक पदाधिकारी तात्काळ घटनास्थळी पोहोचले.त्यांनी गावकऱ्यांशी संवाद साधत परिसरात सावध राहण्याचे आवाहन केले.तसेच,वाघाच्या संभाव्य हालचालींचा मागोवा घेण्यासाठी कॅमेरे बसवण्याचा आणि गस्ती वाढवण्याचा निर्णय घेतला आहे.वनविभागाने गावकऱ्यांना रात्रीच्या वेळेस एकट्याने बाहेर न जाण्याचा सल्ला दिला असून, पाळीव प्राणी सुरक्षित ठिकाणी ठेवण्याचे निर्देश देण्यात आले आहेत.