उद्रेक न्युज वृत्त
कोरची(गडचिरोली) :- पत्नी आणि आठ वर्षाची मुलगी झोपेत असताना आज २९ मे रोजी पहाटे ३ च्या सुमारास पतीने कुऱ्हाडीने वार करुन पत्नीचा खून केला.ही थरारक घटना कोरची तालुक्यातील बेतकाठी गावात घडली.अमरोतीन रोहिदास बंजार वय वय ३३ वर्षे असे मृत पत्नीचे तर रोहिदास बिरसिंग बंजार वय ४० वर्षे असे आरोपी पतीचे नाव आहे.पोलिसांनी रोहिदासला अटक केली आहे.
२००९ मध्ये रोहिदास व अमरोतीन यांचे लग्न झाले. त्यांना ४ मुली आहेत.नवव्या वर्गात शिकणारी मोठी मुलगी ही घटनेच्या वेळी छत्तीसगडला आपल्या मामाच्या गावी गेली होती.तर मधल्या दोन मुली आपल्या आजीच्या घरी झोपल्या होत्या.घरी रोहिदास, अमरोतीन आणि सर्वात लहान मुलगी झोपले होते.
पहाटे तीन वाजताच्या सुमारास रोहिदासने अमरोतीनच्या मानेवर कुऱ्हाडीने वार करुन ठार केले. यात ती जागीच मृत्यू झाली.त्यानंतर रक्ताने माखलेली कुऱ्हाड घेऊन रोहिदास बाजार चौकात गेला.काही वेळाने कुऱ्हाड पाण्याने धुऊन ती घरामागच्या झुडुपात फेकली.लहान मुलीने आईचा खून झाल्याचे बघताच आक्रोश केला.तिच्या रडण्याने शेजारच्या घरात राहणारा रोहिदासचा मोठा भाऊ नोहारसिंग जागा झाला.त्याने काही युवकांच्या मदतीने रोहिदासला पकडून खुर्चीत बसवून खांबाला बांधून ठेवत पोलिसांच्या स्वाधीन केले.पोलिसांनी त्याला अटक केली असून पोलीस निरीक्षक चंद्रकांत वाबळे घटनेचा तपास करीत आहेत.
रोहिदास आणि अमरोतीन यांना चार मुली आहेत.१५ वर्षीय माधुरी नववीत, १३ वर्षीय मनिषा सातवीत, ११ वर्षीय कौशल्या पाचवीत, तर ८ वर्षीय वैशाली दुसऱ्या वर्गात शिकत आहे. आईचा खून झाल्याने चारही मुली सैरभैर झाल्या.त्यांचे हुंदके बघून गाव सुन्न झाले.
