मतदानपूर्व तयारीची कामे पूर्ण; मतदानाकरिता प्रशासन सज्ज.. – देसाईगंज नगर परिषद निवडणूक सबंधाने मतदान पथकांचे दुसरे प्रशिक्षण संपन्न..

देसाईगंज(गडचिरोली):-देसाईगंज नगर परिषदेसाठी येत्या २ डिसेंबर रोजी मतदान पार पड़णार आहे.या अनुषंगाने देसाईगंज नगर परिषदेची  मतदानपूर्व तयारीची कामे जवळपास पूर्ण झाली असून मतदानाकरिता प्रशासन सज्ज झाले आहे.दरम्यान काल गुरुवारी देसाईगंज नगर परिषदेचे सांस्कृतिक सभागृह येथे मतदान पथकांचे दुसरे प्रशिक्षण पार पडले.या प्रशिक्षण सत्रात राखीव मतदान पथकांसह एकुण ४३ पथकांचे प्रशिक्षण निवडणूक निर्णय अधिकारी तथा तहसिलदार प्रिती डुडूलकर व सहाय्यक निवडणूक निर्णय अधिकारी तथा मुख्याधिकारी सतीश चौधरी यांचे मार्गदर्शनात पार पडले.

निवडणूक निर्णय अधिकारी तथा देसाईगंजचे तहसीलदार प्रिती डूडूलकर यांनी मतदान पथकांतील मतदान केंद्राध्यक्ष,मतदान अधिकारी १,२ व ३ यांचे मतदानापूर्वी व मतदान संपल्यानंतरचे मतदान पथकांची कामे,कर्तव्य व जबाबदाऱ्या,ईव्हिएमचे विविध भाग व त्यांचे कार्य,निवडणूक कामाकरीता लागणारी विविध प्रपत्रे व दस्ताऐवज याबाबत सविस्तर मार्गदर्शन केले. तसेच हॅन्डस् ऑनचे माध्यमातून ग्राम महसूल अधिकारी यांनी प्रात्याक्षिक करुन दाखविले तसेच  प्रशिक्षणार्थींनी प्रत्यक्ष ईव्हीएम यंत्राची हाताळणी करुन ईव्हीएम बद्दल सविस्तर माहिती जाणून घेतली.यावेळी नगर परिषद निवडणूकीकरीता नियुक्त सर्व क्षेत्रीय अधिकारी,मतदान केंद्राध्यक्ष,मतदान अधिकारी १,२ व ३ तसेच ईतर अधिकारी व कर्मचारी उपस्थित होते.