पाच हजारासाठी पोलीस हवालदार अडकला लाच लुचपत प्रतिबंधक विभागाच्या जाळ्यात..

भंडारा :-बाहेर वास्तव्यास गेलेल्या तक्रारदाराच्या घरावर दुसऱ्यांनीच ताबा केला.त्यामुळे तक्रारदारांनी पोलीस ठाणे गाठले.पोलिसांत तक्रार दिल्यानंतर मुळ मालकास घराचा ताबा मिळवून देण्यासाठी एका पोलिस हवालदाराने मोबदला म्हणून २० हजार रुपये लाचेची मागणी केली.यात पहिला हप्ता म्हणून ५ हजार रुपयांची लाच स्वीकारण्याची तयारी दर्शविल्याने लाच लुचपत प्रतिबंधक विभागाने सापळा रचत पकडले.पोलीस हवालदाराला ताब्यात घेतले असून लाखनी पोलिसात गुन्हा दाखल करण्याची प्रक्रिया सुरु होती.राजेश निळकंठराव भजने वय ४९ वर्षे रा.समर्थ नगर लाखनी,जि.भंडारा असे या पोलीस हवालदाराचे नाव आहे.

तक्रारदार ही नागपूर जिल्ह्यातील रहिवासी असून त्यांनी सन २०१८ मध्ये लाखनी येथे एक घर खरेदी केले होते.त्यांनतर ते नागपूर येथे राहण्यास गेले होते. १७ एप्रिल २०२५ रोजी एक महिला व तिचा मुलगा यांनी त्यांचे घराचे कुलूप तोडून त्याचा ताबा घेतला. यावेळी तक्रारदार यांनी पोलीस ठाणे लाखनी येथे तक्रार दिली असता घटनेच्या अनुषंगाने लाखनी पोलिसांनी १८ एप्रिल २०२५ ला महिला व तिच्या मुलाविरुद्ध गुन्हा नोंदविला.या गुन्ह्यात सहकार्य करून महिला व तिच्या मुलास घरातून बाहेर काढून घराचा ताबा तक्रारदार यांना देण्याकरिता पोलीस हवालदार राजेश भजने यांनी तक्रारदाराकडे २० हजार रुपये लाचेची मागणी केली.त्याचा पहिला हफ्ता ५ हजार रुपये त्यांनी लाच म्हणून मागितला आहे, अशी तक्रार लाच लुचपत प्रतिबंधक विभाग भंडारा येथे २२ एप्रिल रोजी करण्यात आली.

तक्रारीच्या अनुषंगाने २३ एप्रिल रोजी करण्यात आलेल्या पडताळणी दरम्यान लोकसेवक पोलीस हवालदार भजने यांनी तडजोडअंती लाच रकमेचा पहिला हफ्ता ५ हजार रुपये स्वतः साठी स्वीकारण्याची तयारी दर्शविल्याचे निष्पन्न झाले. तक्रारीवरून काल बुधवारी १४ मे रोजी सापळा रचण्यात आला.भजने यांना तक्रारदार यांचा संशय आल्याने त्यांनी लाचेची रक्कम स्वीकारली नाही. याप्रकरणी पोलीस हवालदार राजेश भजने यांना ताब्यात घेण्यात आले असून गुन्हा दाखल करण्याची प्रक्रिया सुरू आहे.सदरची कारवाई पोलीस उपधीक्षक डॉ.अरुणकुमार लोहार यांच्या मार्गदर्शनात पोलिस उपनिरीक्षक संजय कुंजरकर,हवालदार मिथुन चांदेवार,अतुल मेश्राम,शिलपेंद्र मेश्राम,अंकुश गाढवे, नरेंद्र लाखडे,विष्णू वरठी,चेतन पोटे,मयूर सिंगणजूडे, विवेक रणदिवे,राहुल राऊत यांनी केली.