नायलॉन मांजा विक्री करणाऱ्या दुकानदारांवर कारवाई..

चंद्रपूर :-जिल्ह्यातच नव्हे तर राज्यात अनेकांना नायलॉन मांजाच्या धाग्यामुळे आपला जीव गमावावा लागला आहे.नायलॉन मांजाची विक्री करण्यावर बंदी असतांनाही काहीजण पैश्याच्या लालसेने नागरिकांच्या जीवाशी खेळ करू लागल्याचा प्रकार चंद्रपूर शहरात उघडकीस आला आहे.प्रकरणी चंद्रपूर  स्थानिक गुन्हे शाखेच्या पथकाने धडक कारवाई करत चंद्रपूर शहराच्या इंदिरानगर परिसरात प्रतिबंधित नायलॉन मांजाची विक्री करणाऱ्या दोन दुकानदारांकडून तब्बल ५० हजार रुपयांचा मुद्देमाल जप्त करून दोघांना ताब्यात घेतले आहे.मनिष सुरेश राउत वय ४७ वर्षे,रा.बॉम्बे प्लॉट, राजीव गांधी नगर, चंद्रपूर व एकनाथ केशव चवरे वय ५२ वर्षे,रा.बॉम्बे प्लॉट,इंदिरानगर,चंद्रपूर अशी अटक करण्यात आलेल्या आरोपींची नावे आहेत.

चंद्रपूर जिल्हा पोलीस अधीक्षक मुम्मका सुदर्शन

यांच्या आदेशान्वये जिल्ह्यात अवैध नायलॉन मांजा विक्री करणाऱ्यांविरुद्ध धडक मोहीम सुरू करण्यात आली आहे.अश्यातच मिळालेल्या गोपनीय माहितीच्या आधारे स्थानिक गुन्हे शाखेच्या पथकाने शहराच्या इंदिरानगर परिसरातील मनिष राउत याच्या दुकानाची झाडाझडती केली असता विविध रंगांच्या प्लास्टिक चक्रीवर गुंडाळलेला २४ नग प्रतिबंधित नायलॉन मांजा धागा, किंमत अंदाजे २४ हजार रुपये व एकनाथ चवरे याच्याकडून २६ नग प्रतिबंधित नायलॉन मांजा धागा, किंमत अंदाजे २६ हजार रुपये असा एकूण ५० हजार रुपयांचा मुद्देमाल जप्त करून रामनगर पोलीस ठाण्यात दोघांविरोधात पर्यावरण (संरक्षण)अधिनियम अंतर्गत गुन्हा दाखल केला आहे.सदरची कारवाई जिल्हा पोलीस अधीक्षक मुम्मका सुदर्शन,अप्पर पोलीस अधीक्षक ईश्वर कातकडे यांच्या मार्गदर्शनाखाली पोलीस निरीक्षक अमोल काचोरे यांच्या नेतृत्वात पोलीस उपनिरीक्षक विनोद भुरले,सुनील गौरकार,पोलीस हवालदार सुभाष गोहोकार, सतीश अवथरे,रजनिकांत पुठ्ठावार,दीपक डोंगरे,इम्रान खान,पोलीस अंमलदार किशोर वाकाटे, शशांक बदामवार,हिरालाल गुप्ता,छाया निकोडे यांचेसह चंद्रपूर स्थानिक गुन्हे शाखेच्या पथकाने केली.