नकली नोटा चलनात आणणारी टोळी सक्रिय; शंभर रुपयाच्या नकली नोट नंतर आता दोनशे रुपयांची नकली नोट..

भंडारा :-शहरात मागील आठवड्यात शंभर रूपयांची एक नकली नोट आढळून आल्याने परिसरात एकच खळबळ उडाली होती.अश्यातच आता परत एक दोनशे रूपयांची नकली नोट सापडल्याने चलनात नकली नोटा आणणारी टोळी सक्रिय असल्याची शक्यता वर्तविण्यात येत आहे.त्यामुळे याकडे दुर्लक्ष न करता नकली नोटा आणणाऱ्या तसेच छपाई करणाऱ्या अज्ञात टोळीचा मागोवा घेऊन,अशांच्या मुसक्या आवळणे गरजेचे झाले आहे.दोन दिवसांपूर्वी भंडारा शहरातील एका औषधाच्या दुकानात काम करणाऱ्या चक्रधर नामक तरुणाकडे चलनातून दोनशे रुपयांची नोट आली होती.तो नेहमीप्रमाणे बँकेत रक्कम भरण्यासाठी गेला असता, बैंक कर्मचाऱ्याने तपासून ती बनावट असल्याचे सांगून त्याला परत केली.मात्र,ही नोट नेमकी कुणाकडून आली,याचा मागोवा घेणे आता कठीण झाले आहे. अशा बनावट नोटा मोठ्या प्रमाणावर चलनात असतील,तर नागरिकांना मोठा आर्थिक फटका बसू शकतो. आढळलेल्या दोनशेच्या नोटेवरील वॉटरमार्कमध्ये महात्मा गांधींची प्रतिमा नाही.मूळ नोटेपेक्षा कागद पातळ व निकृष्ट दर्जाचा असून रंगसंगती व छपाई संशयास्पद असल्याने पटकन लक्षात आले.हळूहळू एक-एक नकली नोटा उघडकीस येऊ लागल्याने जवळ असलेली नोट नकली तर नाही ना? म्हणून भीती व्यक्त करण्यात येत आहे.