दिव्यांगांनी दिव्यांग सहाय्यक पोर्टलवर नोंदणी करुन एकाच छताखाली विविध शासकिय योजनांचा लाभ घ्यावा.. -देसाईगंज नगर परिषदेचे मुख्याधिकारी सतीश चौधरी

देसाईगंज(गडचिरोली):-दिव्यांग व्यक्तींच्या कल्याण, पुनर्वसन व सक्षमीकरणासाठी स्वतंत्रपणे कार्य करण्याच्या उद्देशाने दिव्यांग कल्याण विभागाची स्थापना १५ डिसेंबर २०२२ रोजी करण्यात आली.स्वतंत्र विभाग स्थापन केल्यामुळे दिव्यांग विषयक योजनांची प्रभावी अंमलबजावणी व केंद्रित प्रशासन अधिक सक्षम झाले आहे.हे विभाग दिव्यांग व्यक्तींकरीता शिक्षण,रोजगार, कौशल्य विकास,सामाजिक सुरक्षा,सहाय्यक साधने व उपकरणे तसेच आर्थिक सहाय्य संबंधित केंद्र व राज्य शासनाच्या विविध योजनांची अंमलबजावणी करतो. तसेच,दिव्यांग व्यक्ती हक्क अधिनियम,२०१६ च्या प्रभावी अंमलबजावणीसाठी प्रयत्नशील राहून,सुलभता व समान संधींचा प्रसार करतो आणि इतर विभागांशी समन्वय साधून दिव्यांग व्यक्तींसाठी समावेशक व शाश्वत विकास सुनिश्चित करतो.दिव्यांग सहाय्यक पोर्टल हे दिव्यांग कल्याण विभागामार्फत विकसित करण्यात आलेले एक एकात्मिक डिजिटल व्यासपीठ असून, दिव्यांग व्यक्तींना विविध शासकीय योजना, सेवा व लाभांचा एकाच ठिकाणी(Single Window)लाभ मिळावा या उद्देशाने तयार करण्यात आले आहे.

या पोर्टलचा मुख्य उद्देश समावेशकता,समान संधी व डिजिटल सक्षमीकरणाला प्रोत्साहन देणे हा आहे.या माध्यमातून योजना अर्ज,अर्जच्या स्थितीची तपासणी, तक्रार निवारण व संबंधित माहिती सहज उपलब्ध करून दिली जाते.प्रशासकीय प्रक्रिया सुलभ करणे,विभागीय समन्वय बळकट करणे आणि प्रत्येक पात्र लाभार्थ्याला शासनाच्या सेवांचा अखंड व सुलभ लाभ मिळावा यासाठी हे पोर्टल कार्यरत आहे.नगर परिषद क्षेत्रातील कायम दिव्यांग असलेल्या सर्व दिव्यांग बांधवांनी या पोर्टलवर नोंदणी करुन दिव्यांगांसाठी असणाऱ्या विविध योजनांचा लाभ घ्यावा व अधिक माहितीकरीता नगर परिषदेच्या दिव्यांग विभागाशी संपर्क साधावा,असे आवाहन देसाईगंज नगर परिषदेचे मुख्याधिकारी सतीश चौधरी यांनी केले आहे .