चोरटे घरफोडी करायला आले; नागरिक धावले असता चप्पल ठेऊनच पळाले..!

नागपूर :-अज्ञात चोरट्यांनी एकाच घरी तिसऱ्यांदा चोरी करण्याचा बेत आखला,अशातच वारंवार चोरी करणाऱ्यांना पकडुन चांगलाच चोप देऊ,असे नागरिकांनी ठरवले.मात्र,नागरिकांनी चोरट्यांना घेराव घालताच चोरट्यांनी विना चप्पलनेच पळ काढल्याची गंमतीशीर घटना नागपूर जिल्ह्याच्या सावनेर तालुक्यातील दहेगाव (रंगारी) येथे नुकतीच उघडकीस आली. सदर घटनेचा संपूर्ण घटनाक्रम सीसीटीव्ही कॅमेऱ्यात कैद झाला आहे.

अशोक शिंदे,रा.साई मंदिराजवळ,दहेगाव (रंगारी),ता. सावनेर यांच्या घरात शनिवारी मध्यरात्री दोन चोरटे शिरल्याचा शेजाऱ्यांना सुगावा लागला होता.त्यांनी या बाबतची माहिती फोनवरून काही नागरिकांना दिल्याने त्यांनी चोरट्यांना पकडण्यासाठी लगेच योजना आखली.चोरट्यांना पकडण्यासाठी नागरिकांनी हातात लाठ्या घेऊन शिंदे यांच्या घराला व्यवस्थित घेराव केला.घराबाहेर नागरिक असल्याचे लक्षात येताच चोरट्यांनी शिंदे यांच्या घराच्या छतावरून शेजारच्या घरावर उडी मारत खाली उतरून पळ काढला. नागरिकांनी त्यांचा पाठलाग केला.परंतु,ते अंधाराचा फायदा घेत रेल्वे रूळ ओलांडून चनकापूर (ता.सावनेर) च्या दिशेने पळून गेले.दोघेही २५ ते ३० वर्षे वयोगटातील होते,अशी माहिती प्रत्यक्षदर्शीनी दिली.चोरट्यांनी अशोक शिंदे यांच्या घरी चोरी करण्याचा तिसऱ्यांदा प्रयत्न केल्याची माहिती त्यांच्या शेजाऱ्यांनी दिली.घटनेच्या दिवशी अशोक शिंदे आणि त्यांच्या पत्नी मुंबईला गेले असल्याने घरी कुणी नव्हते.घर कुलूपबंद असल्याचे चोरट्यांनी आधीच हेरले असावे.