घरातील फ्रिजचा अचानक स्फोट; वडील व दोन मुलांचा होरपळून मृत्यू..

मध्यरात्रीच्या सुमारास पावस्कर कुटूंबीय गाढ झोपेत असतांना अचानक घरातील फ्रिजचा मोठा स्फोट झाला आणि काही क्षणांतच घराला आगीने वेढा घातला.घराला प्लास्टिक शीट लावलेली असल्याने आगीचा भडका अधिकच उडाला.आग लागल्यानंतर जीव वाचवण्यासाठी मुलांनी धडपड केली.१२ वर्षांचा कुशल आग टाळण्यासाठी घरातील बाथरूममध्ये जाऊन लपला होता.मात्र,प्लास्टिक शीटमुळे आग वेगाने पसरली आणि धुराचे लोट वाढल्याने मुलांचा गुदमरून आणि होरपळून मृत्यू झाला.स्थानिक नागरिकांना मध्यरात्री घरातून मुलांच्या किंचाळण्याचे आवाज ऐकू येताच नागरिकांनी घटनास्थळी धाव घेत दरवाजा तोडून आत अडकलेल्यांना वाचवण्याचा प्रयत्न केला,मात्र तो निष्फळ ठरला.अग्निशमन दल घटनास्थळी पोहोचण्यापूर्वीच स्थानिक नागरिकांनी बादल्यांमधून पाणी टाकून आग विझवण्याचा प्रयत्न केला.पण,आगीचा भडका उडाल्याने अग्निशमन दलाला पाचारण करण्यात आले.घटनेची माहिती मिळताच अग्निशमन दलाच्या ४ ते ५ गाड्या तात्काळ घटनास्थळी दाखल झाल्या.जवानांनी शर्थीचे प्रयत्न करून अर्ध्या तासात आगीवर नियंत्रण मिळवले. अग्निशमन दलाच्या जवानांनी तिघांनाही बाहेर काढून पोलीस व्हॅन व खासगी वाहनांच्या मदतीने ट्रॉमा केअर रुग्णालयात दाखल केले.मात्र,तोपर्यंत पावस्कर कुटुंबातील तिन्ही सदस्यांचा मृत्यू झाला होता. अचानक घटनेने परिसरात शोककळा पसरली आहे.