“गोकुळात नांदो आनंद”.. नैनपूर शाळेत कृष्ण जन्माष्टमी उत्सव मोठ्या उत्साहात साजरा..!

कार्यक्रमाच्या सुरुवातीला गावातील माऊली भजनी मंडळाने गोपालकाला,भजन,कीर्तन सादर करून शाळेत भक्तिमय वातावरण निर्माण केले.त्यानंतर वर्ग १ व २ च्या विद्यार्थ्यांनी कृष्ण व राधाच्या गणवेशामध्ये फॅशन शो सादर करून उपस्थितांना मंत्रमुग्ध केले. विजेत्यांना मान्यवरांच्या हस्ते पारितोषिके प्रदान करण्यात आली.यानंतर वर्ग पाचवीच्या विद्यार्थ्यांनी कृष्ण व गोपिकेचा सुंदर नृत्याविष्कार सादर करून उपस्थितांचे मन मोहून टाकले.कार्यक्रमाचा मुख्य आकर्षण ठरला दहीहंडी उत्सव.वर्ग ४ व ५ च्या विद्यार्थ्यांनी “गोविंदा रे गोपाळा” म्हणत विविध ग्रुप तयार करून दहीहंडी फोडण्याचा प्रयत्न केला. गावातील प्रतिष्ठित नागरिक,शाळा व्यवस्थापन समिती सदस्य,शिक्षक व मुख्याध्यापकांनीही आपले पथक तयार करून उत्साहाने दहीहंडी फोडली.यानंतर मुख्याध्यापक खेमराज तिघरे यांनी ग्रामस्थांना मार्गदर्शन करतांना आपल्या संस्कृतीतील परंपरा, त्यामागील शास्त्रीय विचार आणि विज्ञानाशी असलेला संबंध यावर सखोल व सोप्या भाषेत मोलाचे विवेचन केले.शेवटी भक्तीमय संगीताच्या तालावर विद्यार्थी,शिक्षक आणि ग्रामस्थांनी भक्तिभावाने नृत्य सादर केले.महापूजनाने या भव्यदिव्य कार्यक्रमाची सांगता झाली.प्रसंगी शाळेतील शिक्षक ईश्वर गहाणे,मंगेश तुपट,तृषाली सुखदेवे,अपर्णा जडे,प्रियंका तलमले, प्राची खरकाटे तसेच मुख्याध्यापक खेमराज तिघरे यांनी कार्यक्रमाच्या आयोजनात मोलाचा सहभाग नोंदविला.