कहाणी मध्ये ट्विस्ट..! ‘त्याने’ खून करण्यासाठी ऑनलाईन बोलावलेला चाकू होता दुसऱ्यासाठीच..! – अल्पवयीन प्रियकराने १५ वर्षीय प्रेयसीचा खून केल्याचे प्रकरण..

नागपूर :-नागपूरच्या रामबाग परिसरात वास्तव्यास असणारा अल्पवयीन प्रियकर व इयत्ता दहाव्या वर्गात शिक्षण घेणारी कौशल्यायन नगरातील एंजेल जॉन यांचे प्रेमप्रकरण इयत्ता सातव्या वर्गापासून रंगू लागले होते.बऱ्याच कालावधीपासून सुरू असलेल्या प्रेमप्रकरणात मागील तीन महिन्यांपासून दुरावा निर्माण झाला होता.त्यामुळे एंजेलने त्याला भेटण्यास तसेच प्रेमसंबंध तोडण्याचा प्रयत्न केला.अश्यातच अंगात सैतान संचारलेल्या प्रियकराने प्रेयसीचा खून केल्याची घटना नागपूरच्या अजनी पोलिस ठाण्याच्या हद्दीतील बदामी कॉलनी परिसरात असलेल्या सेंट अँथोनी शाळेसमोर भर दुपारी शुक्रवारी २९ ऑगस्ट रोजी घडली होती.एंजेल जॉन वय १५ वर्षे,रा.कौशल्यायन नगर, नागपूर असे मृत विद्यार्थिनीचे नाव असून ती सेंट अँथोनी शाळेमध्ये इयत्ता दहाव्या वर्गात शिकत होती.तर अल्पवयीन आरोपी हा रामबाग परिसरात आई,भाऊ आणि बहिणीसह राहतो.आरोपी केअरटेकर म्हणून काम करतो.त्याचे वडीलही कुख्यात गुन्हेगार असून त्याच्या वडिलांवर चेन स्नॅचिंग,खून आणि हत्येचा प्रयत्न असे अनेक गुन्हे दाखल आहेत.

पोलिसांनी दिलेल्या माहितीनुसार,आरोपी अल्पवयीन प्रियकर हा १७ वर्षे ८ महिन्याचा असून तो १५ वर्षीय प्रेयसीच्या प्रेमात वेडापिसा झाला होता.गेल्या तीन महिन्यांपासून एंजेल माझ्याशी कां बोलत नाही? तिच्या जीवनात दुसरा कुणी तरी आला असावा? त्यामुळे त्याचा काटा काढण्यासाठी त्याने आठ दिवसांपूर्वीच ऑनलाईनवरून चाकू खरेदी केला होता.तशी योजनाही आरोपी प्रियकराने आखली होती.त्यानुसार एंजेलने ज्या मित्राला फ्रेंड रिक्वेस्ट पाठवली होती,त्या मित्राची आरोपीने सर्वप्रथम भेट घेत त्याला समजावून सांगितले. ती माझी आहे,तिच्या जीवनात तुझी एंट्री धोकादायक ठरू शकते.फ्रेंड रिक्वेस्ट पाठविलेल्या मित्राने आरोपीला सांगितले की,एंजेलच्या मैत्रीची रिक्वेस्ट केव्हाचाच फेटाळलो आहे,त्यामुळे मनात शंका बाळगू नकोस,असे म्हणताच आरोपी प्रियकराने त्याला सोडून दिले.अन्यथा सर्वप्रथम टार्गेटवर तोच होता.त्यासाठीच आरोपीने ऑनलाईनवरून चाकू खरेदी केला होता.मात्र,प्रेमात कावरा-बावरा झालेल्या आरोपी प्रियकराने इयत्ता सातव्या वर्गापासून सुरू असलेल्या प्रेमाचा शेवट खून करून केला आहे.