हायवा ट्रकचा अपघात; दोघांचा जागीच मृत्यू..

चंद्रपूर :-एका अनियंत्रित हायवा ट्रकचा अपघात होऊन दोघांचा जागीच मृत्यू झाल्याची घटना आज, गुरुवार ११ जून रोजी पहाटेच्या सुमारास ब्रम्हपुरी तालुक्यातील पारडगाव नजिकच्या निलगिरी बारसमोर घडली. अपघातात ट्रकचा चालक सुरेश आनंदराव भुरले वय ३३ वर्षे,रा.मांडळ,ता.लाखांदूर, जि.भंडारा व सहकारी क्लिनर अमित देवराव कुमरे वय २९ वर्षे,रा.इरवा, ता.चिमूर,जि.चंद्रपूर या दोघांचा मृत्यू झाला.

आज गुरुवारी पहाटेच्या सुमारास एमएच ४० सीडी ९००२ क्रमांकाचा हायवा ट्रक गिट्टीची वाहतूक करीत होता.ट्रक पारडगाव जवळ येताच चालकाचे गाडीवरील नियंत्रण सुटले आणि गिट्टीने भरलेला ट्रक रस्त्याच्या कडेला असलेल्या खोल नाल्यात कोसळला.यात चालक व क्लिनर हे दोघेही ट्रकच्या समोरील केबिनमध्ये अडकून पडल्याने जागीच मृत पावले.घटनेची माहिती मिळताच ब्रम्हपुरी पोलिसांनी घटनास्थळी धाव घेत स्थानिक प्रशासन आणि नागरिकांच्या मदतीने शर्थीचे प्रयत्न करत दोन्ही मृतदेह ट्रकचे केबिन कापून बाहेर काढण्यात आले.