सावधान..! गॅस सिलिंडरमधून गॅस काढून रिकाम्या सिलिंडरमध्ये भरतांना दोघे सापडले.. – हंड्यात तब्बल अडीच किलो गॅस कमी; वजन काटा करूनच गॅस खरेदी करा..

गोंदिया :-अनेकजण घरगुती गॅस सिलेंडर खरेदी करतांना वजन काटा न करताच गॅस घरी आणत असतात.त्यामुळे काही महिन्यांतच गॅस संपल्याची ओरड सुरू होते.अशी ओरड सुरू होणे साहजिकच आहे; कारण की,अनेकदा ग्राहकांच्या घाई-घडबडीचा फायदा घेणाऱ्यांची संख्या वाढली आहे.नफेखोरीसाठी कोण? कुठल्या स्तरावर जाऊन पोहचेल हे सांगता येत नाही; असाच प्रकार गोंदिया जिल्ह्यात उघडकीस आला आहे.घरगुती वापराच्या गॅस सिलिंडरमधून गॅस काढून रिकाम्या सिलिंडरमध्ये रिफिलींग करीत असतांना पोलिसांनी दोघांना रंगेहाथ पकडले आहे. रामनगर पोलिस ठाण्यांतर्गत ग्राम गोंडीटोला येथील इंडेन गॅस कंपनीच्या गोदामात दोन दिवसांपूर्वी म्हणजेच शुक्रवारी दुपारी ३ वाजता कारवाई करण्यात आली.

गॅस सिलिंडरमधून गॅस काढून ग्राहकांची फसवणूक केली जात असल्याचे प्रकार वाढले असून,तसे प्रकार उघडकीस सुद्धा आले आहेत.यातूनच रामनगर पोलिसांनी ग्राम गोंडीटोला येथील इंडेन गॅस कंपनीच्या गोदामावर धाड टाकली.तेथे आरोपी सुरेश राजाराम परतेती वय ३२ वर्षे,रा.गोंडीटोला व सुरेश दुलीचंद दमाहे वय ३२ वर्षे,स्कूलटोली-हिवरा हे दोघे ग्राहकांना वितरित करण्यासाठी वापरण्यात येणाऱ्या भरलेल्या सिलिंडरला इलेक्ट्रिक मोटार लावून रेग्युलेटरच्या सहाय्याने काही प्रमाणात गॅस काढून रिकाम्या सिलिंडरमध्ये भरून काळाबाजार करतांना आढळले.

तहसील कार्यालयातील कनिष्ठ लिपिक हेमराज वसंत शहारे वय ३९ वर्षे यांच्या तक्रारीवरून रामनगर पोलिसांनी जीवनावश्यक वस्तू अधिनियम कलम ३,७ अन्वये गुन्हा दाखल केला आहे.पुढील तपास पोलिस उपनिरीक्षक अमोल वाघमोडे करीत आहेत.

गॅस सिलिंडर खरेदी करतांना त्याचे वजन केले का?, सिलिंडर घेतांना वजन करा.आपल्या गॅस हंड्यात तब्बल अडीच किलो गॅस कमी असतो.या प्रकरणानंतर आता हा प्रकार उघडकीस आला असून,आता सिलिंडर घेतांना त्याचे वजन करूनच घेणे गरजेचे झाले आहे.गॅस सिलिंडर देताना ग्राहकांना त्याची पावती देणे अनिवार्य आहे.मात्र,सिलिंडर देतांना ग्राहकांना पावती दिली जात नाही.अशांवर आता कारवाई करण्याची गरज आहे.गॅस सिलिंडर वाटप करणाऱ्या व्यक्तींनी वजन काटा व गॅस लिकेज मशीन सोबत ठेवणे अपेक्षित आहे.गॅस सिलिंडर वाटप करणाऱ्यांकडे वजन काटा व लिकेज मशीन उपलब्ध नसते.त्यामुळे काळाबाजार करणाऱ्यांचे प्रमाण वाढलेले दिसून येत आहे; यावर त्वरित आळा घालण्याची मागणी केली जात आहे.