संशय आल्याने दहा हजार घेण्यास नकार; पण तरीही गुन्हा दाखल.. -पोलीस हवालदारावर लाचलुचपत प्रतिबंधक विभागाची कारवाई..

भंडारा :-दाखल गुन्ह्यातील गुन्ह्याचे स्वरूप कमी करून तपासात मदत करण्याच्या नावाखाली दहा हजार रुपयांची लाच स्वीकारण्याची तयारी दर्शविणाऱ्या एका पोलीस हवालदारावर भंडारा लाच लुचपत प्रतिबंधक विभागाने गुन्हा दाखल केला आहे.प्रकरणातील तक्रारदार व त्यांच्या मोठ्या भावाच्या विरोधात भंडारा जिल्ह्याच्या मोहाडी तालुक्यातील करडी पोलीस ठाण्यात एक गुन्हा दाखल होता.सदरच्या गुन्ह्याचा तपास करडी ठाण्यातील पोलीस हवालदार प्रफुल चोखोबा वालदे करीत होते.तपासादरम्यान प्रफुल वालदे यांनी गुन्ह्याचे स्वरूप कमी करून तपासात मदत करण्याच्या नावाखाली तक्रारदाराकडे १५ हजार रुपयांच्या लाचेची मागणी केली.तक्रारदाराला लाच देणे मान्य नसल्याने त्यांनी भंडारा लाचलुचपत प्रतिबंधक विभागाकडे तक्रार नोंदवली.त्यानुसार,एसीबीच्या पथकाने सोमवार २९ जून २०२६ रोजी पडताळणी केली असता पोलीस हवालदार वालदे यांनी तक्रारदाराकडे १५ हजार रुपयांची मागणी करून तडजोडीअंती दहा हजार रुपये स्वीकारण्याची तयारी दर्शविली.मात्र,सापळा कारवाईदरम्यान तक्रारदारावर संशय आल्याने पोलीस हवालदाराने लाचेची रक्कम स्वीकारण्यास असहमती दर्शवली.पण, लाचेची रक्कम मागणी केल्याचे निष्पन्न झाल्याने प्रफुल वालदे यांच्या विरोधात भ्रष्टाचार प्रतिबंधक कायद्यान्वये करडी पोलिस ठाण्यात गुन्हा दाखल करण्यात आला आहे.