रोजगार हमीचा तांत्रिक सहाय्यक सात हजारासाठी अडकला एसीबीच्या जाळ्यात..

May 13, 2026

791

- Advertisement -

उद्रेक न्युज वृत्त :-रोजगार हमी योजनेअंतर्गत मंजूर झालेल्या विहीरीचे बांधकाम पुर्ण झाल्याने झालेल्या कामाच्या उर्वरीत अनुदानाची रक्कम काढण्यासाठी शाखा अभियंता व उप अभियंता यांची नावे पुढे करून स्वतः ७ हजाराची लाच स्विकारल्याप्रकरणी पंचायत समितीच्या रोजगार हमी योजना शाखेतील तांत्रिक सहाय्यकास धुळे जिल्हा लाच लुचपत प्रतिबंधक विभागाच्या पथकाने रंगेहाथ पकडले.विश्वजित संजय भामरे,वय ३१ वर्षे,तांत्रिक सहाय्यक,महात्मा गांधी राष्ट्रीय ग्रामीण रोजगार हमी योजना,पंचायत समिती,धुळे असे लाचखोर कर्मचाऱ्याचे नाव आहे.

अधिक माहिती अशी की,तक्रारदार यांच्या भाऊ व वहिणीच्या नावे धुळे तालुक्यातील मौजा नंदाळे बु.येथे शेतजमीन असुन सदरची शेतजमीन तक्रारदार कसत आहे.सदर शेतजमीनीमध्ये तक्रारदार यांच्या वहिणीस महाराष्ट्र शासनाच्या राष्ट्रीय रोजगार हमी योजने अंतर्गत सन २०२३-२४ मध्ये विहिर खोदण्यासाठी ३ लाख ९९ हजार ६१० रुपये मंजुर झाले आहेत.सदर मंजुर झालेल्या विहीरीच्या अनुदानापैकी २ लाख ३९ हजार रुपये तक्रारदार यांच्या वहिणीस अदा करण्यात आले आहे.सदर विहीरीचे काम पुर्ण झाल्याने झालेल्या कामाच्या उर्वरीत अनुदानाची रक्कम मिळण्याकरीता तक्रारदार हे पाठपुरावा करीत होते.तक्रारदार यांनी ५ मे २०२६ रोजी पंचायत समिती,धुळे कार्यालयात जाऊन उर्वरीत अनुदानाच्या रकमेबाबत तांत्रिक सहाय्यक विश्वजित भामरे यांची भेट घेतली असता त्यांनी तक्रारदार यांना विहिरीची मोजमाप पुस्तिका तपासणी करीता पुढे पाठविण्यासाठी शाखा अभियंता व उप अभियंता यांचेकरीता ७ हजार रुपये लाचेची मागणी केल्याने तक्रारदार यांनी लाच लुचपत प्रतिबंधक विभागाच्या धुळे कार्यालयात समक्ष हजर राहुन मंगळवार १२ मे २०२६ रोजी तक्रार दिली होती.

सदर तक्रारीची पंचासमक्ष पडताळणी केली असता तांत्रिक सहाय्यक विश्वजित भामरे याने तक्रारदार यांच्याकडे स्वतः करीता तसेच वरिष्ठांकरीता ७ हजार रुपये लाचेची मागणी करुन लाच स्विकारण्याचे मान्य केले.त्यानंतर सापळा कारवाई दरम्यान तांत्रिक सहायक विश्वजित भामरे याने तक्रारदार यांचेकडुन ७ हजार रुपये लाचेची रक्कम पंचासमक्ष स्विकारली असता त्याला रंगेहात पकडण्यात आले.प्रकरणी त्याचेविरोधात देवपूर पोलिस ठाण्यात भ्रष्टाचार प्रतिबंधक कायद्याच्या कलम ७ व ७-अ प्रमाणे गुन्हा दाखल करण्यात आला आहे.

सदरची कारवाई पर्यवेक्षण अधिकारी सचिन साळुंखे पोलीस उप अधीक्षक,लाचलुचपत प्रतिबंधक विभाग, धुळे,सापळा अधिकारी यशवंत बोरसे पोलीस निरीक्षक,ला.प्र.विभाग,धुळे,तपास अधिकारी पद्मावती कलाल पोलीस निरीक्षक,ला.प्र.विभाग,धुळे तसेच

सापळा पथकातील पोलीस हेडकॉन्स्टेबल राजन कदम, मुकेश अहिरे,संतोष पावरा,प्रविण मोरे,पोलीस कॉन्स्टेबल मकरंद पाटील,प्रविण पाटील,सागर शिर्के,प्रितेश चौधरी, चंद्रकांत सैंदाणे,सागर माळी,मपोकॉ रेश्मा परदेशी, पोहेकॉ सुधीर मोरे,पोकॉ.जगदीश बडगुजर यांच्या पथकाने केली.