रेतीच्या वाहतुकीबाबत अधिकारी,कर्मचाऱ्यांना इत्थंभूत माहिती; पण.. -आर्थिक लागेबांधे असल्याने भानगडीत पडणार कोण?

नागपूर :-सध्या स्थितीत लिलाव झालेले रेती घाट सर्वत्र बंद स्वरूपात आहेत.घरकुल लाभार्थ्यांना बांधकामासाठी रेती मिळत नाही.अश्यातच इतर बांधकामासाठी रेती चढ्या दराने सहज उपलब्ध होत आहे.सदरची वाहतूक विनारॉयल्टी व ओव्हरलोड  असतांना याकडे महसूल व पोलिस विभाग दुर्लक्ष करून लगतच्या भंडारा जिल्ह्यातील रेतीला नागपूर जिल्ह्यात ‘अच्छे दिन’ आलेत.नागपूर जिल्ह्याच्या मौदा शहरापासून अवघ्या १० ते १४ किलोमिटर अंतरावर भंडारा जिल्ह्याची सीमा सुरू होते.नागपूर जिल्ह्यातील कन्हान नदीसोबतच भंडारा जिल्ह्यातील वैनगंगा नदीतील तांबड्या रेतीला बाजारात भरीव मागणी आहे.शहरासह तालुक्यात सध्या शेकडो बांधकामे सुरू असून,त्यांना रोज हजारो ब्रास रेतीची आवश्यकता भासते.ही गरज भंडारा जिल्ह्यातून बोलावून पूर्ण केली जाते.रेती घाट बंद असतांना बहुतांश टिप्पर चालकांकडे दोन ते तीन ब्रास रेती वाहतुकीची रॉयल्टी असते आणि ते याच रॉयल्टीवर १० ते १५ ब्रास रेती वाहतूक करतात.रेती विनारॉयल्टी सोबतच ओव्हरलोड देखील असते.या रेतीची वाहतूक रोज रात्री ९ ते दुसऱ्या दिवशी पहाटे ४:३० वाजेपर्यंत सुरू असते.भंडारा जिल्ह्यातील रेती याच तालुक्यातून पुढे नागपूर शहरासह, रामटेक व पारशिवनी तालुक्यात व पुढे वर्धा,अमरावती जिल्ह्यांसह इतरत्र नेली जाते.या रेतीच्या वाहतुकीबाबत महसूल व पोलिस विभागातील प्रत्येक अधिकारी व कर्मचाऱ्यांना इत्थंभूत माहिती आहे.मात्र,याला आळा घालण्यासाठी ते कुठलीही उपाययोजना करीत नाहीत. कागदोपत्री दाखविण्यासाठी अधूनमधून एक-दोन टिप्पर, ट्रॅक्टर पकडले जातात.मागील दोन महिन्यांपासून ते देखील पूर्णपणे बंद आहे.आर्थिक लागेबांधे असल्याने पकडण्याच्या भानगडीत पडणार कोण?असा सूर उमटू लागला आहे.