कुरूड येथील आशास्वयंसेविका पद भरती रद्द करुन पारदर्शी प्रक्रिया राबवा- देसाईगंज वंचित बहुजन आघाडी – २० हजार रुपये न दिल्याने भरती प्रक्रियेतुन बाद करण्याचा आरोप..

देसाईगंज(गडचिरोली):-देसाईगंज तालुक्याच्या कुरुड प्राथमिक आरोग्य केन्द्राअंतर्गत निवड करण्यात आलेल्या आशास्वयंसेविका पदभरतीत मोठ्या प्रमाणावर भ्रष्टाचार झाला असुन निवड समितीने नियम धाब्यावर बसवुन पात्र विधवा महिलेला डावलले.याविषयी योग्य चौकशी करावी व भरती प्रक्रिया रद्द करुन पारदर्शी पद्धतीने निवड प्रक्रिया राबवावी,अश्या मागणीचे निवेदन आज,शुक्रवार २९ ऑगस्ट रोजी देसाईगंज वंचित बहुजन आघाडीच्या वतीने राज्याचे मुख्यमंत्री तथा गडचिरोली जिल्ह्याचे पालकमंत्री देवेंद्र फडणवीस यांचेसह राज्याचे आरोग्य मंत्री,गडचिरोली जिल्हा परिषदेचे मुख्य कार्यकारी अधिकारी,जिल्हा आरोग्य अधिकारी तसेच तहसिलदार देसाईगंज यांना सादर करण्यात आले.

कुरुड येथील रहिवासी असलेल्या कल्याणी महेश वासनिक या विधवा महिलेसह ६३ महिलांनी आशावर्करच्या २ पदांसाठी तालुका वैद्यकिय अधिकारी देसाईगंज यांचेकडे अर्ज सादर केले होते.उच्चशिक्षित असलेल्या कल्याणी वासनिक यांना निवड समितीचे सचिव डॉ.पत्रुजी सडमाके यांनी २० हजार रुपयांची मागणी केली.मात्र,पैसे न दिल्याने सदर महिलेला मौखिक परिक्षेत कमी गुण देऊन भरती प्रक्रियेतुन बाद करण्यात आले.हा सुशिक्षित विधवा महिलेवर अन्याय असुन या प्रकरणाची सखोल चौकशी करुन सदर भरती प्रक्रिया पारदर्शी पद्धतीने पार पाडण्यासाठी दुसऱ्यांदा निवड प्रक्रिया राबवुन व्हिडीओ कॉन्फरन्स रेकॉर्डींग करण्यात यावे,अशी मागणी निवेदनाच्या माध्यमातुन करण्यात आली आहे.देसाईगंजच्या तहसिलदार प्रिती डुडुलकर यांना निवेदन सादर करतांना कल्याणी वासनिक यांचेसह वंचित बहुजन आघाडीचे जिल्हा महासचिव राजरतन मेश्राम,जिल्हा उपाध्यक्ष प्रा.भीमराव शेन्डे,महिला आघाडी जिल्हाध्यक्ष प्रद्न्या निमगडे,देसाईगंज तालुकाध्यक्ष विनोद मेश्राम,शहराध्यक्ष प्रा.अशोक मेश्राम,दिलिप बन्सोड,अभियंता प्रमोद मेश्राम,कुंदा झाडे,भारती मेश्राम, कुमता मेश्राम,ज्योती दहिकर, रविना मेश्राम,प्राजक्ता मेश्राम,अक्षता ठवरे,प्रिया घोडेस्वार,विजय मेश्राम,प्रियंका बोरकर,मनिषा गणवीर यांचेसह कुरुडचे ग्रामस्थ उपस्थित होते.