विद्यार्थ्यांना आता कोरोना काळासारखेच ऑनलाईन शिक्षणाचे धडे मिळण्याची शक्यता.. – इंधन दरवाढीचा परिणाम..

नागपूर :-‘थेंबे थेंबे तळे साचे’ या म्हणीप्रमाणे पेट्रोल आणि डिझेलच्या वाढत्या दरांनी सर्वसामान्यांना मोठा झटका देण्यास सुरुवात केली आहे.पेट्रोल आणि डिझेलच्या दरात तीनदा  झालेली वाढ न थांबता परत चौथ्यांदा वाढ झाल्याने सर्वसामान्य नागरिकांना महागाईच्या भडक्याला सामोरे जावे लागणार आहे.१५ मे २०२६ रोजी पेट्रोलच्या  दरात ३ रुपये,तर डिझेलच्या दरात ३.११ रुपयांची वाढ करण्यात आली होती. त्यानंतर,२० मे रोजी दुसऱ्यांदा वाढ करून पेट्रोलच्या दरात ८६ पैसे आणि डिझेलच्या दरात ८३ पैशांची वाढ करण्यात आली होती.परत तिसऱ्यांदा म्हणजेच,शनिवार २३ मे रोजी पेट्रोलचा प्रतिलीटर दर ८७ पैसे,तर डिझेलचा प्रतिलीटर दर ९१ पैशाने वाढविण्यात आला आहे.तर काल,सोमवार २५ मे रोजी देशात चौथ्यांदा इंधन दरवाढ झाली.त्यात पेट्रोल प्रति लीटर २.६१ रुपये,तर डिझेल २.१७ रुपयांनी महाग झाले.आतापर्यंत पेट्रोलचे भाव ७.३८ रुपयांनी,तर डिझेलचे भाव ७.०९ रुपयांनी वाढले आहेत.अश्यातच पेट्रोल,डिझेलच्या दरवाढीमुळे नागपूर स्कूल बस व स्कूल व्हॅन संघटनेने आपल्या सेवा शुल्कात तब्बल १० ते १५ टक्के वाढ करण्याचा निर्णय घेतला आहे.त्यामुळे यंदा जे पालक दरमहा एक हजार भाडे देतात,त्यांना यापुढे बाराशे रुपये,तर दोन हजार रुपये भाडे देणाऱ्या पालकांना २ हजार ४०० रुपये भाडे द्यावे लागणार आहे.यामुळे विद्यार्थ्यांच्या शिक्षणालाही या इंधनदरवाढीमुळे निर्माण झालेल्या महागाईचा फटका बसणार आहे.

त्यातच,राज्यातील स्कूल बस संघटनेने राज्यातील शाळा आठवड्यातून तीन दिवसच भरवा आणि उर्वरित दोन दिवस ऑनलाईन वर्ग सुरू ठेवा,अशी मागणी  केली आहे.त्यामुळे नव्या शैक्षणिक वर्षात पुन्हा एकदा विद्यार्थ्यांना कोरोना काळासारखेच ऑनलाईन शिक्षणाचे धडे मिळण्याची शक्यता आहे.

उन्हाळी सुट्ट्यानंतर जून महिन्यात पुन्हा एकदा शाळेची घंटा वाजेल.सर्वत्र विद्यार्थ्यांचा किलबिलाट ऐकू येईल. पण,राज्यातील इंधन संकट दिवसागणिक अधिक गडद होत आहे.या पार्श्वभूमीवर स्कूल बस मालकांनी इंधन पुरवठा पूर्ववत होईपर्यंत नव्या शैक्षणिक वर्षात शाळा आठवड्यातून केवळ तीन दिवस भरवण्याची मागणी केली आहे.त्यांच्या मते, सध्या पेट्रोल डिझेलची मोठी दरवाढ झाली आहे. त्यामुळे जुन्या दरात स्कूल बसची सेवा सुरू ठेवणे आर्थिकदृष्ट्या परवडणारे नाही.त्यामुळे शाळा एकाच सत्रात सुरू ठेवण्यात याव्यात.विशेषतः शाळा आठवड्यातून तीन दिवसच शाळा भरवा व दोन दिवस ऑनलाईन वर्ग सुरू ठेवा.राज्य सरकारने या प्रकरणी शाळा सुरू होण्यापूर्वी म्हणजे १ जूनपर्यंत आपली भूमिका स्पष्ट करावी.तसेच स्कूल बस क्षेत्राला तातडीने दिलासा देत अनुदान किंवा सवलत जाहीर करावी,अशी मागणी राज्यातील स्कूल अँड कंपनी बस ओनर्स असोसिएशनने म्हटले आहे.याद्वारे त्यांनी स्कूल बसचे भाडे वाढवण्याचेही संकेत दिलेत.