चारचाकी वाहनाची दुचाकीला धडक; तरुणाचा मृत्यू..

गडचिरोली :-गृहप्रवेशाच्या पत्रिका देण्यासाठी निघालेल्या तरुणावर वाटेतच काळाने झडप घालून मृत्यूने गाठल्याची घटना आज,गुरुवार २८ मे रोजी सकाळी ११ वाजेच्या दरम्यान धानोरा तालुक्याच्या रांगी येथील वळण मार्गावर घडली.नंदू चमरशींग तुलावी अंदाजे वय ३८ वर्षे,रा.खेडेगाव(मुरुमगाव),ता.धानोरा, जि.गडचिरोली असे अपघातात मृत पावलेल्या तरुणाचे नाव आहे.मृतक नंदू तुलावी हे कोरेगाव(रांगी)येथे वास्तव्यास असणाऱ्या आपल्या बहिणीच्या घरी गृहप्रवेशाची पत्रिका देण्यासाठी जात असतांनाच अपघातात मृत पावल्याने बहीण-भावाची भेट अपघातामुळे शेवटची ठरल्याने सर्वत्र हळहळ व्यक्त केली जात आहे.नंदू तुलावी हे आज सकाळी साडे दहाच्या सुमारास एमएच ३३ एबी १०३९ क्रमांकाच्या दुचाकीने गृहप्रवेशाची पत्रिका देण्यासाठी धानोराकडून बहिणीच्या गावाकडे निघाले होते.दरम्यान,लिसिट हायस्कूलजवळील वळण मार्गावर येताच रांगीहून धानोराच्या दिशेने भरधाव वेगात असलेल्या एका  चारचाकी वाहनाने दुचाकीला समोरून जोरदार धडक दिली.धडक इतकी भीषण होती की नंदू तुलावी हे दूरवर फेकले जाऊन त्यांच्या डोक्याला जबर मार लागला.यातच त्यांची प्राणज्योत मालवली. मार्गावरून जाणाऱ्या नागरिकांनी घटनास्थळी धाव घेत पोलिसांना माहिती दिली.धानोरा पोलिसांनी घटनास्थळी धाव घेत घटनेचा पंचनामा करून अपघातातील चारचाकी वाहन ताब्यात घेत पुढील तपास सुरू केला आहे.घटनेने तुलावी कुटूंबीयांवर दुःखाचा डोंगर कोसळला आहे.