यंत्रणा पाकिटे घेण्यात व्यस्त..! कामाच्या ठिकाणी माहितीदर्शक फलकाचा अभाव..

देसाईगंज(गडचिरोली):-देसाईगंज तालुक्यातील अनेक ग्रामीण भागांत विविध विकासकामांचा धडाका सुरू आहे.सीसी रोड,नाली बांधकाम व रस्ता रुंदीकरण आदी कामे आचारसंहिता संपल्यानंतर वेगाने सुरू करण्यात आली आहेत.पण,कामाच्या ठिकाणी माहितीदर्शक फलकाचा अभाव आहे.ग्रामीण भागातील विविध पर्यवेक्षीय यंत्रणाही फिरकून पाहत नसल्याचे चित्र आहे.त्यामुळे यंत्रणा पाकिटे घेण्यात व्यस्त तर नसावी ना..! अश्या चर्चांना सर्वत्र उधाण आले आहे.

सिमेंट रस्ते,नाली बांधकाम,रस्ता रुंदीकरण आदी विकासकामे जोमाने सुरू आहेत.निवडणूक आचारसंहितेच्या कालावधीत ही विकासकामे सुरू होती.परंतु,कोणत्याही विकासकामांच्या ठिकाणी त्या कामाबाबत सविस्तर माहिती दर्शक फलक लावले जात नाहीत.शासन नियमानुसार बांधकामस्थळी माहितीचा फलक लावणे गरजेचे आहे.

रस्ता व इतर कामे करणाऱ्या संबंधित कंत्राटदाराचे नाव,किती मीटर अंतराचे काम,दोन्ही बाजूंनी किती मीटर रुंदीकरण करण्यात येत आहे? किती लाखांचा निधी मंजूर झाला? कोणत्या फंडातून ते काम आहे तसेच संबंधित देखरेख अभियंत्याचे नाव असलेला फलक जनतेला कळण्यासाठी लावणे गरजेचे आहे. मात्र,फलक न लावल्यामुळे ग्रामीण भागातील जनता या कामांबाबत पूर्णतः अनभिज्ञच आहे.त्यातच संबंधित यंत्रणेसह ग्रामपंचायत पदाधिकारीही जाणून बुजून लोकांना त्याची माहिती होऊ नये; यासाठी अंगाला हळद लावीत नसल्याचे दिसून येत आहे. त्यामुळे याबाबत वरिष्ठांना तक्रार करण्यात येणार असल्याची भूमिका सुजाण नागरिकांनी स्पष्ट केली आहे.