उद्रेक न्युज वृत्त :-महाराष्ट्र राज्यातील २९ महानगरपालिकांचे गुरुवार १५ जानेवारी रोजी मतदान पार पडले.तर शुक्रवार १६ जानेवारी रोजी मतमोजणी होऊन नगरसेवक निवडीचा मार्ग मोकळा झाला.मात्र, विविध महानगरपालिकेच्या महापौरपदांचे आरक्षण अद्याप जाहीर करण्यात आले नसल्याने कोणत्या प्रवर्गाचा महापौर कोणत्या महानगरपालिकेमध्ये बसणार?अशी उत्कंठा शिगेला पोहोचली होती.अश्यातच आता महापौरपदाच्या आरक्षणाच्या सोडत बाबत मोठी बातमी समोर आली आहे.त्यानुसार,आज,सोमवार १९ जानेवारी रोजी राज्याच्या नगरविकास विभागाकडून एक पत्रक काढण्यात आले आहे.त्यात राज्यातील २९ महानगरपालिकांमधील महापौर पदाचे आरक्षण निश्चितीसाठी आरक्षणाची सोडत राज्यमंत्री(नगर विकास)महोदयांच्या अध्यक्षतेखाली येत्या,गुरुवार,२२ जानेवारी रोजी परिषद सभागृह, ६ वा मजला,मंत्रालय, मुंबई येथे सकाळी ११ वाजतापासून आयोजित करण्यात आली आहे.त्यामुळे कोणत्या प्रवर्गाचा महापौर कोणत्या महानगरपालिकेमध्ये बसणार हे येत्या २२ जानेवारीला कळणार आहे.महापौरपदाचे आरक्षण चक्राकार पद्धतीने निश्चित करण्यात येते.समाजातील सर्व घटकांना महापौर पदाची संधी मिळावी,यासाठी चक्राकार पद्धतीने आरक्षणाची सोडत काढण्यात येते.सध्या कायद्यात एससी,एसटी,महिला आणि ओबीसींसाठी रोटेशनने आरक्षण आहे.मात्र,नियमातील नव्या बदलानुसार चक्राकार पद्धत नव्याने सुरु केली जाऊ शकते.
