महागाईची झळ; दुग्धजन्य पदार्थांच्या किंमतीसह दूध विक्रीत होणार वाढ..

उद्रेक न्युज वृत्त :-अगोदरच महागाईने सर्वसामान्यांचे कंबरडे मोडलेले असतांनाच आता त्यात आणखी भर पडून दूध उत्पादक आणि प्रक्रिया व्यावसायिकांनी दूध विक्रीच्या दरात प्रतिलिटर दोन रुपयांची वाढ करण्याचा निर्णय घेतला आहे.केवळ दूधच नव्हे,तर दही,ताक, पनीर,तूप यांसारख्या विविध दुग्धजन्य पदार्थांच्या किंमतीतही तब्बल दहा टक्क्यांपर्यंत वाढ होणार आहे. नवे दर हे येत्या,मंगळवार ११ ऑगस्ट २०२६ पासून लागू होणार आहेत.विशेष म्हणजे,डिझेलच्या दरात लिटरमागे दहा रुपये,साखरेच्या दरात किलोमागे बारा रुपये आणि पॅकिंग साहित्यात तीस टक्क्यांहून अधिक वाढ झाल्याने दूध व्यावसायिकांचे आर्थिक गणित कोलमडले आहे. सदरचा वाढता उत्पादन खर्च भागवण्यासाठी आणि दूध उत्पादक शेतकऱ्यांना योग्य मोबदला मिळावा यासाठी दरवाढ करण्याचा निर्णय महाराष्ट्र राज्यातील सहकारी आणि खासगी डेअऱ्यांची शिखर संस्था असलेल्या दूध उत्पादक व प्रक्रिया व्यावसायिक कल्याणकारी संघाने घेतला आहे.त्यानुसार,गायीचे दूध ६० रुपयांवरून ६२ रुपये,म्हशीचे दूध ७६ रुपयांवरून ७८ रुपये,तर

दुग्धजन्य पदार्थ दहा टक्क्यांपर्यंत महागणार आहेत. सदरच्या निर्णयामुळे दररोज दूध खरेदी करणाऱ्या सर्वसामान्य कुटुंबांच्या मासिक बजेटवर मोठा ताण येणार आहे.यासह,दुग्धजन्य पदार्थांचे भाव वाढल्यास हॉटेल व्यवसाय,मिठाईची दुकाने आणि बेकरी उद्योगांवरही याचा थेट परिणाम दिसून येणार आहे.