नववर्षाचा आनंद साजरा करतांना अपघात टाळा,नियम पाळा अन् सुरक्षित रहा..

चंद्रपूर :-दोन दिवसांनी म्हणजेच ३१ डिसेंबरला सर्वत्र नववर्षाची धूम सुरू आहे.सरत्या वर्षाच्या शेवटी मद्यप्राशन करून वाहने सुसाट वेगाने पळवणे, बेदरकारपणे चालविणे,रॅश ड्रायव्हिंग, स्टंटबाजीसारखे प्रकार घडत असून यामुळे गंभीर अपघात व जीवितहानीचे प्रमाण वाढत आहे.या धोकादायक प्रवृत्तीला आळा घालण्यासाठी चंद्रपूर जिल्हा पोलीस दलाने कठोर पावले उचलली आहेत.जिल्ह्यात दिनांक- २८ डिसेंबर २०२५ पासून ३१ डिसेंबर २०२५ पर्यंत संपूर्ण चंद्रपूर जिल्ह्यात ठिकठिकाणी नाकाबंदी लावून विशेष तपासणी मोहीम राबविण्यात येणार आहे.या कालावधीत मद्यप्राशन करून वाहन चालविणाऱ्या चालकांवर कठोर दंडात्मक कारवाई केली जाणार असल्याचा इशारा पोलीस प्रशासनाने दिला आहे.

वाहतूक नियंत्रण शाखा,चंद्रपूर तसेच जिल्ह्यातील सर्व पोलीस ठाण्यांच्या हद्दीत ड्रंक अँड ड्राईव्ह,ट्रिपल सीट, रॅश ड्रायव्हिंग व स्टंटबाजी करणाऱ्या वाहनचालकांविरुद्ध विशेष मोहीम हाती घेण्यात येणार असून नियमभंग करणाऱ्यांवर मोठ्या प्रमाणात दंडात्मक कारवाई करण्यात येणार आहे.दरम्यान,सर्व नागरिकांनी मद्यप्राशन करून वाहन चालवू नये, वाहतुकीच्या नियमांचे काटेकोर पालन करावे व सुरक्षिततेला प्राधान्य द्यावे,असे आवाहन चंद्रपूर जिल्हा पोलीस अधीक्षक मुम्मका सुदर्शन यांनी जिल्हा पोलीस विभागाच्या वतीने केले आहे.