देसाईगंज आदर्श महाविद्यालयाच्या विद्यार्थ्यांनी घेतला वनस्पती व जैवविविधतेचा प्रत्यक्ष अनुभव..

देसाईगंज(गडचिरोली):-आदर्श कला,वाणिज्य व विज्ञान महाविद्यालय देसाईगंज येथील वनस्पतीशास्त्र विभागाच्या वतीने प्राचार्य डॉ.श्रीराम गहाणे यांच्या मार्गदर्शनाखाली ‘फील्ड प्रोजेक्ट’ अंतर्गत एक दिवसीय फील्ड विजिटचे आयोजन करण्यात आले.या भेटीदरम्यान विद्यार्थ्यांनी चंद्रपूर येथील श्रद्धेय अटल बिहारी वाजपेयी बॉटॅनिकल गार्डन,विसापूर येथे भेट देऊन विविध वनस्पती,जैवविविधता तसेच पर्यावरणाचा प्रत्यक्ष अभ्यास केला.या शैक्षणिक भेटीचे आयोजन वनस्पतीशास्त्र विभागाचे प्रा.योगेश तुपट यांच्या नेतृत्वात करण्यात आले.विद्यार्थ्यांनी बॉटॅनिकल गार्डनमधील विविध वनस्पतींचे निरीक्षण करून त्यांची वैशिष्ट्ये, प्रकार,त्याचे पर्यावरणातील महत्त्व तसेच जैवविविधतेशी असलेला संबंध यांचा प्रत्यक्ष अनुभव घेतला.यावेळी विज्ञान विभागातील प्रा.ज्ञानेश मोहुर्ले,प्रा.दीपक तुपटे, प्रा.मनीषा कार,प्रा. शिफाना शेख,प्रा.दिपिका शर्मा, प्रा.रोशनी पारधी आदि प्राध्यापकांनी सहकार्य केले.या शैक्षणिक सहलीमुळे विद्यार्थ्यांना वर्गातील सैद्धांतिक ज्ञानासोबतच प्रत्यक्ष निरीक्षण व अनुभवातून वनस्पती आणि पर्यावरणाचा अभ्यास करण्याची संधी मिळाली. त्यामुळे सदर शैक्षणिक सहल विद्यार्थ्यांसाठी अनुभवाधारित शिक्षणाचा उपयुक्त उपक्रम ठरली.