तुरीच्या शेंगा तोडत असतांना वाघाचा हल्ला; महिला ठार..

नागपूर :-शेतावर तुरीच्या शेंगा तोडत असतांना एका ४२ वर्षीय महिलेवर वाघाने हल्ला चढवून ठार केल्याची खळबळजनक घटना नागपूर जिल्ह्याच्या रामटेक तालुक्यातील पिपरिया परिसरातील वनविभागाच्या कॉलनीजवळ पवनी बफर झोनमधील कक्ष क्रमांक-२५४ मध्ये काल मंगळवारी सायंकाळच्या सुमारास घडली. संगीता गोपीचंद वघारे वय ४२ वर्षे, रा.नयाकुंड, ता.पारशिवनी,जि.नागपूर असे वाघाच्या हल्ल्यात ठार झालेल्या महिलेचे नाव असून त्या पिपरिया गावनजीक असलेल्या फार्महाऊसवर गेल्या दहा ते बारा वर्षांपासून पती व तीन मुलींसह वास्तव्यास होत्या.

संगीता वघारे ह्या काल मंगळवारी एकट्याच शेतशिवारात तुरीच्या शेंगा तोडण्यासाठी गेल्या होत्या. तुरीच्या शेंगा तोडत असतांनाच दबा धरून बसलेल्या वाघाने अचानकपणे त्यांच्यावर हल्ला करून दूरवर फरफटत नेले.बाजूच्या शेतात काही महिला कामाला गेल्या होत्या.संगीता यांची ओळख असल्याने त्यांनी शेतातून परततांना आवाज दिला.परंतु,प्रतिसाद न मिळाल्याने त्या महिलांनी त्यांच्या मुलीला विचारले.तिने आई शेतात तुरीच्या शेंगा तोडत असल्याचे सांगितले. अश्यातच मुलीने आईला बऱ्याचदा हाक मारली. परंतु, कुठलाही प्रतिसाद न मिळाल्याने कुटुंबीयांनी संगीताचा शोध सुरू केला.काही अंतरावर पाहतात तो काय, संगीताचा मृतदेह रक्ताच्या थारोळ्यात पडलेला दिसून आला.आईचा मृतदेह पाहून मुलींनी एकच हंबरडा फोडला.घटनेची माहिती होताच ग्रामस्थांनी घटनास्थळी धाव घेत मोठी गर्दी करून घटनेची माहिती तात्काळ वन विभागास देण्यात आली.रात्री पर्यंत पंचनामा व शवविच्छेदनाची प्रक्रिया सुरू करण्यात आली.अचानक घडलेल्या घटनेने तिन्ही मुली आईविना पोरक्या झाल्या असून कुटुंबियांवर मोठा आघात झाला आहे.घटनेने परिसरात हळहळ व्यक्त केली जात आहे.