गोवंशाची तस्करी; गुन्हे शाखेची कारवाई.. – दोघे ताब्यात,एकजण फरार..

चंद्रपूर :-स्थानिक गुन्हे शाखेच्या पथकाने गोवंशाची तस्करी करणाऱ्या दोन आरोपींच्या मुसक्या आवळून तब्बल ६ लाख ६० हजारांचा मुद्देमाल जप्त करून ८ नग गोवंशाची(बैल)सुटका केली आहे.प्रकरणी गुन्हे शाखेच्या पथकाने विजय कुशाल बट्टे वय २७ वर्षे, रा.घडोली, ता.गोंडपिपरी,जि.चंद्रपूर व स्वप्नील प्रल्हाद फुलझेले वय ३२ वर्षे,रा.येरगाव यांना ताब्यात घेत त्यांच्यावर मुल पोलीस ठाण्यात अपराध क्रमांक- ६१९/२०२५ नुसार भा.प्रा.क्रू.वा.प्र.अ.१९६०, म.प्रा.सं.अ.१९७६ (सुधारित २०१५)तसेच भारतीय न्याय संहिता २०२४ अंतर्गत विविध कलमान्वये गुन्हा नोंद करण्यात आला आहे. प्रकरणातील मुख्य सूत्रधार फैयाज रा.करीमनगर, जि.तेलंगणा हा आरोपी अद्याप फरार असून पोलिसांकडून त्याचा शोध सुरू आहे.

चंद्रपूर स्थानिक गुन्हे शाखेच्या पथकास मिळालेल्या गोपनीय माहितीच्या आधारे मुल पोलीस स्टेशन हद्दीतील नांदगाव येथे रात्रीच्या सुमारास नाकाबंदी करण्यात आली.नाकाबंदी दरम्यान संशयित एमएच ३४ बीझेड ९१५२ क्रमांकाचे पिकअप वाहन थांबवून तपासणी केली असता अत्यंत अमानुष पद्धतीने गोवंशांची वाहतूक सुरू असल्याचे निदर्शनास आले. त्यानुसार,अवैधरित्या वाहतूक करण्यात येणारे ८ नग गोवंश(बैल)जप्त करण्यात आले असून दोन आरोपींना ताब्यात घेण्यात आले आहे.जप्त करण्यात आलेल्या गोवंशांना सुरक्षिततेसाठी प्यार फाउंडेशन,छोटा नागपूर,जि.चंद्रपूर येथे दाखल करण्यात आले असून ताब्यातील दोन्ही आरोपींची वैद्यकीय तपासणी करून पुढील तपासासाठी त्यांना मुल पोलिसांच्या ताब्यात देण्यात आले आहे.सदर कारवाई पोलीस अधीक्षक मुमक्का सुदर्शन व अप्पर पोलीस अधीक्षक ईश्वर कातकडे यांच्या मार्गदर्शनाखाली स्थानिक गुन्हे शाखेचे पोलीस निरीक्षक अमोल काचोरे यांच्या नेतृत्वात मूल उपविभागाच्या पथकाने यशस्वीरीत्या पार पाडली.