आता खेळाडूंना घरबसल्या मिळवता येणार डिजिटल क्रीडा प्रमाणपत्र..

गडचिरोली :-महाराष्ट्रातील गुणवंत खेळाडूंना शासकीय व निमशासकीय सेवांमधील ५ टक्के आरक्षणाचा लाभ अधिक सुलभ व पारदर्शक पद्धतीने मिळावा यासाठी क्रीडा व युवक सेवा संचालनालयाने ब्लॉकचेन तंत्रज्ञानावर आधारित ‘क्रीडा ई-प्रमाण’ ही अत्याधुनिक डिजिटल प्रणाली सुरू केली आहे.या प्रणालीद्वारे खेळाडूंना घरबसल्या ऑनलाइन नोंदणी करून आपले डिजिटल क्रीडा प्रमाणपत्र प्राप्त करता येणार आहे. माहिती भरल्यानंतर मूळ अभिलेखाशी पडताळणी झाल्यास अवघ्या २४ तासांत डिजिटल पडताळणी अहवाल उपलब्ध होतो. प्रत्येक प्रमाणपत्रावर क्यूआर कोड असणार असून नियुक्ती प्राधिकाऱ्यांना त्याची सत्यता त्वरित तपासता येईल.

महाराष्ट्र लोकसेवा आयोग(MPSC)तसेच इतर सर्व शासकीय भरती प्रक्रियेत खेळाडू संवर्गातून अर्ज करतांना ‘क्रीडा ई-प्रमाणपत्र’ जोडणे अनिवार्य करण्यात आले आहे.यापूर्वी क्रीडा विभागाकडून पडताळणी केलेल्या खेळाडूंनाही या प्रणालीद्वारे प्रमाणपत्र तयार करून घ्यावे लागणार आहे.

खेळाडूंनी https://sports.maharashtra.gov.in या संकेतस्थळावर जाऊन 5% Reservation या टॅबमध्ये नोंदणी करून आधार-संलग्न मोबाईल क्रमांक,ईमेल आयडी,आधार कार्ड आणि क्रीडा स्पर्धेचे प्रमाणपत्र अपलोड करावे.

कबड्डी,फेन्सिंग,ट्रायथलॉन(२०२५),ज्युडो (२०२४) आणि कुराश (२०१७-१८ व २०२४-२५) या स्पर्धांचे अभिलेख सध्या प्रणालीवर उपलब्ध असून संबंधित खेळाडूंनी त्वरित अर्ज करावा.इतर खेळांचे अभिलेख टप्प्याटप्प्याने अपलोड करण्यात येत आहेत.