आज कुरूड येथे शंकरपटाचे आयोजन; ८ नाट्य प्रयोगांचा धडाका..!

देसाईगंज(गडचिरोली):-देसाईगंज तालुक्याच्या कुरूड येथे आज,गुरुवार ६ फेब्रुवारीला शंकरपटाचे आयोजन करण्यात आले असून या निमित्ताने रात्रीच्या सुमारास गावातील विविध वार्डात ८ नाट्य प्रयोगांचा धडाका असणार आहे.आजचे युग तंत्र ज्ञानाचे युग जरी असले तरीही शंकरपटाची पूर्वीपासूनची चालत आलेली परंपरा आजही कायम असल्याचे चित्र देसाईगंज तालुक्याच्या कुरूड गावात दिसून येत आहे.पंचक्रोशितील लाखो रसिक नाट्यप्रयोगांचा आस्वाद घेण्याकरीता कुरूड गावात दाखल होत असतात.यंदा गावातील विविध वार्डात ८ नाट्य प्रयोगांचे सादरीकरण होणार आहे. आयोजित नाट्य प्रयोगांमध्ये संगीत पेटलेल्या चुली, कसे तोडू मी मंगळसूत्र,अंधारलेल्या वाटा,अंधारातील लाल दिवा, लाडका,सौदा सुहासिनीचा,आहुती, लावणीचा दुय्यम जंगी मुकाबला अश्या ८ नाट्य प्रयोगांचा समावेश आहे.विशेष म्हणजे दुकानदारांनी दुकाने थाटण्याकरीता काल बुधवार पासूनच जागेची शोधाशोध केली.अशातच आज सकाळपासून विविध दुकाने सजू लागली असल्याचे दिसून येत आहे.त्यातच आजूबाजूच्या परिसरातील नागरिकांची गावात मोठ्या प्रमाणावर रेलचेल सुरू झाली असल्याचे पहावयास मिळत आहे.