आंधळी येथे मोफत नेत्रसेवा शिबिर संपन्न; ११७ जणांची तपासणी,तर ३२ रुग्णांवर होणार मोफत शस्त्रक्रिया..

कुरखेडा(गडचिरोली):-ग्रामीण भागातील नागरिकांना दर्जेदार नेत्रसेवा उपलब्ध करून देण्याच्या उद्देशाने महात्मे आय बँक हॉस्पिटल नागपूर,समता फाउंडेशन मुंबई,आधार ग्रामीण विकास संस्था आंधळी आणि गट ग्रामपंचायत आंधळी-नवरगाव यांच्या संयुक्त विद्यमाने आज,मंगळवार २१ जुलै रोजी कुरखेडा तालुक्याच्या आंधळी येथे मोफत नेत्र तपासणी,चष्मे वाटप व मोतीबिंदू शस्त्रक्रिया शिबिर पार पडला.शिबिरात एकूण ११७ नागरिकांची नेत्र तपासणी करण्यात आली.तर तपासणीनंतर ३२ नागरिकांना मोतीबिंदू असल्याचे निदान झाले असून त्यांच्यावर महात्मे आय बँक हॉस्पिटल,नागपूर येथे मोफत शस्त्रक्रिया व पुढील उपचार करण्यात येणार आहेत.याशिवाय ७७ नागरिकांना मोफत चष्म्यांचे वितरण करण्यात आले.

शिबिराच्या उद्घाटनप्रसंगी उपप्रशासक तथा माजी उपसरपंच अप्रव भैसारे,वैद्यकीय अधिकारी डॉ. रामेश्वरी सिन्हा,डॉ.अरविंद डोंगरवार,माजी ग्रामपंचायत सदस्य नानाजी खुणे,मीनाक्षी डोंगरे तसेच सीएचओ वानखेडे उपस्थित होत्या.

शिबिराच्या यशस्वितेसाठी महात्मे हॉस्पिटलचे आयुष गायकवाड,निशा कुमारी,संकेत शेंभरकर,अविनाश आडे,आशा सेविका कोकिता सयाम,वैशाली पंधरे, रत्ना नैताम,ग्रामपंचायत कर्मचारी घनश्याम उईके, शिपाई माधुरी सयाम आणि गुलशन सयाम यांनी मोलाचे सहकार्य केले.

कार्यक्रमाचे सूत्रसंचालन आरोग्य सेवक सुरेंद्र गौतम यांनी केले,तर मंदा वारके यांनी आभार मानले. शिबिरामुळे अनेक गरजू नागरिकांना मोफत नेत्र तपासणी,चष्मे आणि मोतीबिंदू शस्त्रक्रियेचा लाभ मिळाल्याने ग्रामस्थांनी आयोजकांचे आभार व्यक्त केले.