पतीला वेगळ्या खोलीत राहण्यास भाग पाडणे म्हणजे वैवाहिक हक्कांपासून वंचित ठेवणे… – घटस्फोटासाठी दाखल केलेला पतीचा अर्ज मंजूर…

नवी दिल्ली :-बायकोने नवऱ्याला दुसऱ्या खोलीत राहण्यास भाग पाडणे ही क्रूरताच असल्याचा स्पष्ट निर्वाळा देत अलाहाबाद उच्च न्यायालयाने घटस्फोटासाठी दाखल केलेला पतीचा अर्ज मंजूर केला आहे.पत्नी वेगळ्या खोलीत राहायला लावते.तिच्या खोलीत जाण्याचा प्रयत्न केला तर आत्महत्या करण्याची व खोट्या गुन्ह्यात अडकवण्याची धमकी देते,असे पतीने याचिकेत म्हटले होते.याचिकेवर सुनावणीवेळी न्यायमूर्ती रंजन रॉय आणि न्यायमूर्ती सुभाष विद्यार्थी यांच्या खंडपीठाने ही क्रूरता असल्याचे म्हणत घटस्फोट मंजूर केला.

वैवाहिक संबंध संपुष्टात आणण्यासाठी पत्नीने हा प्रकार केला आहे.यात बायको नवऱ्यासोबत एकाच छताखाली राहते की नाही हे कळू शकलेले नाही; मात्र ती नवऱ्याला आपल्या खोलीत शिरू देत नाही; असे म्हणत न्यायालयाने पुढे म्हटले की,सहवास हा वैवाहिक नातेसंबंधात गरजेचा आहे.पत्नीने पतीला वेगळ्या खोलीत राहण्यास भाग पाडले,तर ती त्याला त्याच्या वैवाहिक हक्कांपासून वंचित ठेवत आहे.या गोष्टीचा नवऱ्याच्या मानसिक आणि शारीरिक आरोग्यावर विपरीत परिणाम होतो आणि ही नवऱ्यासोबत केलेली शारीरिक व मानसिक क्रूरताच आहे.२०१८ मध्ये पतीने कौटुंबिक न्यायालयात घटस्फोटाची याचिका दाखल केली.सुरुवातीचे ४ ते ५ महिने पत्नीशी संबंध सामान्य होते.पुढे तिने त्रास देणे सुरू केले; असे पतीने म्हटले होते.आधी पत्नी न्यायालयात हजर राहायची; मात्र नंतर समन्स बजावूनही गैरहजर राहू लागली.त्यामुळे याचिकेवर तिची बाजू ऐकून न घेता आदेश दिला होता.