उद्रेक न्युज वृत्त
चंद्रपूर :- ताडोबा अंधारी व्याघ्र प्रकल्पात जुनाबाई वाघीण तिच्या दोन बछड्यांसह मौज-मस्ती करीत असल्याचा व्हिडीओ सध्या सोशल मीडियावर चांगलाच व्हायरल झाला आहे.मागील सहा दिवसांपासून हा व्हिडीओ व्हायरल झाल्याने जुनाबाई पुन्हा चर्चेत आली आहे.ताडोबात वाघ आणि वाघिणीच्या मौज मस्तीचा विषय नवीन नाही.यापूर्वी उन्हाच्या तडाख्याने आपल्या बछड्यांसह जलाशयात बसून असलेल्या वाघिणीचा व्हिडीओही यापूर्वी सोशल मीडियावर व्हायरल झाला होता.त्यानंतर आता ताडोबाला भेट देणाऱ्या नागपूरच्या पर्यटकानी जुनाबाई वाघिणीची दोन बछड्यांसह मौजमस्तीचा व्हिडीओ समाज माध्यमावर सार्वत्रिक केला आहे. पर्यटक कल्पक डोर्लीकर यांनी हा व्हिडीओ चित्रबद्ध केला असल्याचे समजते.ताडोबात जुनाबाई ही वाघीण गेल्या काही दिवसांपासून प्रसिद्धीच्या झोतात आली आहे.जुनाबाई व तिचे पिल्ले पर्यटकांना मनसोक्त दर्शन देत आहेत.कल्पक हा ताडोबात सफारी करीत असताना जुनाबाई दोन बछड्यांसह दिसली.जुनाबाई बछड्यांसह मोजमस्ती करीत होती. अशातच जंगलात तारेच्या कुंपणवरून उडी घेऊन पिल्लांना सोबत घेत ती जंगलात फेरफटका मारत दूरवर निघून जाते.हा व्हिडीओही समाज माध्यमावर चांगलाच सार्वत्रिक झाला आहे.
