उद्रेक न्युज वृत्त
नागपूर :- उमरेड शहरालगत उत्तर उमरेड वनपरिक्षेत्र भागात बिबट्याचा संचार वाढला असून त्याचे नित्याने दर्शन होऊ लागले आहे.आज,गुरुवार १६ मे रोजी सकाळी साडे नऊ वाजता भिवगड बीट अंतर्गत तेंदुपत्ता संकलनासाठी गेलेल्या महिलेवर बिबट्याने चढविलेल्या हल्ल्यात महिला ठार झाल्याची घटना घडली.या घटनेमुळे गावकऱ्यांत भीतीचे वातावरण पसरले आहे.मृतक महिलेचे नाव कल्पना उत्तम चौधरी वय ३९ वर्षे रा.भिवगड असे आहे.
मिळालेल्या माहितीनुसार,कल्पना चौधरी,निर्मला श्रीरामे,पुष्पा परचाखे,चंद्रकला राऊत,कल्पना काटसरपे आणि इतर काही जण तेंदूपत्ता संकलनासाठी भिवगड वनक्षेत्र परिसरात गेले होते. अचानक दबा धरून बसलेल्या बिबट्याने कल्पना यांच्यावर हल्ला चढविला.नरडीचा घोट घेतल्याने त्यांचा जागीच मृत्यू झाला.घटनेची माहिती वनविभागाला मिळताच वनखात्याचे अधिकारी घटनास्थळी दाखल झाले.मृतक महिलेच्या कुटुंबीयांना तत्काळ मदत म्हणून एक लाख रुपयाची मदत आणि अंत्यसंस्कारासाठीचा खर्च दिल्याची माहिती वनविभागाने दिली आहे.मृतक महिलेच्या पश्चात दोन अपत्य असून १६ वर्षीय मुलगा व १३ वर्षांची मुलगी आहे.या घटनेनंतर ग्रामस्थांनी संताप व्यक्त केला असून वन्यप्राण्यांच्या बंदोबस्तासाठी तातडीने उपाययोजना कराव्यात; अशी मागणी केली आहे.
