नागपूर :- दिवसेंदिवस तापणाऱ्या उन्हामुळे काहीली होत असताना आज गुरूवारी सुमारे दीड तास सोसाट्याच्या वाऱ्यासह आलेल्या मुसळधार पावसाने नागपूरला चांगलेच झोडपले.यामुळे उन्हापासून नागपूर करांना दिलासा मिळाला आहे.प्रादेशिक हवामान खात्याने आज गुरूवारी ऑरेंज अलर्ट दिला होता.सकाळी पावणेदहाच्या सुमारास चांगलेच अंधारून आले.पाठोपाठ मुसळधार पावसाला सुरूवात झाली.सुमारे दीड तास पावसाने हजेरी लावली.
गेल्याच आठवड्यात तापमान ४३ अंश सेल्सिअसवर पोहचले होते.त्यामुळे ऊन मी म्हणत होते. मात्र अचानक वादळीवाऱ्यासह मुसळधार पावसाने झोडपले. ढगांच्या गडगडाटासह पावसाला सुरुवात झाली आणि अवघ्या तास दीड तासातच वातावरण थंडगार झाले.हा पाऊस दुपारपर्यंत कायम होता.दीड तासात ४७ मिमी पाऊस झाला.यावेळी ताशी १८ कि. मी.वेगाने वारे वाहात होते.यामुळे शहराच्या खोलगट भागत पाणी साचले.तर अनेक भागात झाडे पडल्याने वाहतूक विस्कळीत झाल्याच्या घटना घडल्या.पाऊस येताच शहरातील वीज गेली आणि पाऊस थांबताच परत आली.
