अखेर ‘त्या’ तरुणाची ओळख पटली; रेल्वेने कटून शरीराचे झाले होते दोन तुकडे..

देसाईगंज(गडचिरोली):-एका अज्ञात तरुणाचा रेल्वेने कटून मृत्यू झाल्याची घटना काल रविवारी सकाळच्या सुमारास देसाईगंज शहराच्या अगदी हाकेच्या अंतरावर असलेल्या देसाईगंज-गोंदिया मार्गावरील तुकुम परिसरातील रेल्वे रुळावर उघडकीस आल्याने परिसरात एकच खळबळ उडाली होती.रेल्वे रुळावर शरीराचे दोन तुकडे होऊन शरीराचा अर्धा भाग एकीकडे,तर अर्धा भाग रेल्वे रुळावर आढळून आला होता.दरम्यान,घटनेची माहिती तात्काळ देसाईगंज रेल्वे प्रशासन व देसाईगंज पोलिसांना मिळताच पथकाने तातडीने घटनास्थळ गाठून पंचनामा केला व पुढील तपास सुरू केला होता. त्यानुसार,सदर तरुण हा भंडारा जिल्ह्याच्या लाखांदूर तालुक्यातील कन्हाळगाव येथील रहिवासी असल्याची माहिती समोर आली.शंकर केशव बेदरे वय २५ वर्षे, रा.कन्हाळगाव असे मृत तरुणाचे नाव असून त्याने रेल्वेखाली येऊन आत्महत्या केल्याची प्राथमिक माहिती आहे.या घटनेमुळे कन्हाळगाव परिसरात हळहळ व्यक्त केली जात असून बेदरे कुटुंबावर दुःखाचा डोंगर कोसळला आहे.तरुणाच्या आत्महत्येमागील नेमके कारण अद्याप स्पष्ट झालेले नसून घटनेनंतर मृतदेह देसाईगंज ग्रामीण रुग्णालयात नेण्यात आला व शवविच्छेदन प्रक्रिया पूर्ण झाल्यानंतर मृतदेह अंत्यसंस्कारासाठी कुटुंबीयांच्या स्वाधीन करण्यात आला.