अतिविषारी सापाचा दंश; महिलेचा मृत्यू..

चंद्रपूर :-पहाटेच्या सुमारास घरगुती कामे करीत असतांना अतिविषारी सापाने हाताला दंश केल्याने एका २९ वर्षीय महिलेचा दुर्दैवी मृत्यू झाल्याची घटना आज, रविवार १० मे रोजी चंद्रपूर जिल्ह्याच्या चिमूर तालुक्यातील खडसंगी येथे घडली.श्वेता संदीप श्रीरामे वय २९ वर्षे, हल्ली रा.खडसंगी,(मूळ रा.घोडाझरी) असे मृत पावलेल्या महिलेचे नाव आहे.

श्वेता श्रीरामे ह्या आज रविवारच्या पहाटे पाच वाजेच्या दरम्यान घरगुती कामे करीत असतांनाच गवाऱ्या नाग जातीच्या अतिविषारी सापाने त्यांच्या हाताला दंश केला. घटना उघडकीस येताच श्वेता त्यांना तात्काळ चिमूर उपजिल्हा रुग्णालयात दाखल करण्यात आले.तिथे प्राथमिक उपचार करण्यात आले.मात्र,प्रकृती गंभीर असल्याने त्यांना पुढील उपचारासाठी नागपूर येथे हलविण्याचा सल्ला डॉक्टरांनी दिला.दरम्यान,नेत असतांना वाटेतच त्यांचा मृत्यू झाला.घटनेमुळे श्रीरामे कुटुंबावर दुःखाचा डोंगर कोसळला असून परिसरात हळहळ व्यक्त केली जात आहे.