अखेर कुरखेडा नगरपंचायत सफाई कामगारांच्या बेमुदत संपावर तोडगा; संप मागे..

कुरखेडा(गडचिरोली):-कुरखेडा नगरपंचायत अंतर्गत कार्यरत सफाई कामगारांंनी थकीत वेतनाकरीता मागील २३ एप्रीलपासून बेमुदत कामबंद आंदोलन सुरू केले होते.त्यामुळे शहरातील स्वच्छतेचा गंभीर प्रश्न निर्माण झाला होता.अश्यातच आज,गुरुवार ३० एप्रील रोजी कुरखेडा नगरपंचायत पदाधिकाऱ्यांनी शिष्टाई करीत प्रशासनाशी कामगारांची चर्चा घडवून आणली व चर्चेअंती त्यांचे थकीत वेतन अदा करीत या प्रश्नावर तोडगा काढला. त्यामुळे,संपावर असलेले कामगार उद्या शुक्रवारपासून पूर्ववत कामावर रूजू होतील,अशी माहिती नगराध्यक्ष व उपाध्यक्ष यांनी दिली.

कुरखेडा शहराच्या स्वच्छतेचे कंत्राट शहरातीलच एका बचत गटाला देण्यात आले आहे.मात्र,सदर कंत्राट प्रक्रिया राबवितांना काही तांत्रिक अडचणींमुळे मागील दोन महिण्याचे बिल थकीत होते.त्यामुळे कामगारांना वेतन अदा करता आले नाही.परिणामी कामगारांनी कामबंद आंदोलन पुकारले होते.आंदोलन सुरू झाले त्याचवेळी एका महिण्याचे वेतन अदा करीत कामगारांची मनधरणी करण्याचा प्रयत्न करण्यात आला होता.मात्र,कामगारांचे समाधान न झाल्याने हा आंदोलन तिव्र झाला.काल बुधवारी आंदोलकांची आझाद समाज पक्षाचे राज बन्सोड,माकपाचे अमोल मारकवार व आपचे नासिर हाश्मी यांनी भेट घेत नगर पंचायत पदाधिकाऱ्यांशी चर्चा केली होती.अखेर आज नगराध्यक्ष अनिता बोरकर, उपाध्यक्ष बबलू हूसैनी,आरोग्य सभापती सागर निरंकारी, महिला व बालकल्याण सभापती कांताबाई मठ्ठे, नगरसेवक जयेंद्र चंदेल,आशाताई तूलावी,हेमलता नंदेश्वर, अतूल झोळे यांनी शिष्टाई करीत प्रशासनाशी कामगारांची चर्चा घडवून आणली.यावेळी थकीत एका महिन्याचे वेतन त्यांना तात्काळ अदा करण्यात आले.त्यामुळे कामगारांनी संप मागे घेतला व उद्यापासून सर्व कामगार कामावर रूजू होणार असल्याची माहिती नगर पंचायत पदाधिकाऱ्यांनी दिली.