बेपत्ता असलेल्या दोन चिमुकल्यांचे डबक्यात सापडले मृतदेह..

भंडारा :-बेपत्ता असलेल्या दोन चिमुकल्यांचे मृतदेह चक्क गावनजीकच्या पाण्याच्या डबक्यात आढळून आल्याने कुटुंबियांवर दुःखाचा डोंगर कोसळून परिसरात शोककळा पसरल्याची घटना आज,बुधवार १ एप्रिल रोजी सकाळच्या सुमारास भंडारा जिल्ह्याच्या तुमसर तालुक्यातील रोंघा गावात उघडकीस आली.सार्थक संजय उईके वय ६ वर्षे व चंद्रपाल रुपचंद कुंभरे वय ७ वर्षे अशी मृतक चिमुकल्यांची नावे असून दोघेही काल, मंगळवार ३१ मार्चच्या सायंकाळपासून बेपत्ता होते.

रोंघा गावातील सार्थक व चंद्रपाल दिवसभर घराशेजारी खेळत होते.अश्यातच सायंकाळच्या सुमारास दोघेही घरी न परतल्याने कुटुंबियांनी चिंता व्यक्त करून सर्वत्र शोधाशोध सुरू केली.मात्र,दोघांचा कुठेही थांगपत्ता लागलेला नव्हता.रात्रीच्या वेळेस तसेच आज सकाळच्या सुमारास शोध मोहीम सुरू असतांनाच गावातील काही नागरिकांना गावनजीकच्या पाण्याच्या डबक्यात दोन्ही चिमुकल्यांचे मृतदेह तरंगताना दिसून आले.घटनेची माहिती गावात वाऱ्यासारखी पसरताच गावकऱ्यांनी तसेच कुटुंबीयांनी घटनास्थळी धाव घेतली.मृतदेह पाहून दोन्ही कुटुंबीयांचे अश्रू अनावर झाले.घटनेची माहिती पोलीस प्रशासनास तसेच संबंधित प्रशासकीय यंत्रणांना देण्यात आली असून पुढील तपास सुरू आहे.दोन्ही चिमुकल्यांचा मृत्यू नेमका कसा झाला,हे उत्तरीय तपासणीअंती स्पष्ट होणार आहे.