आता स्फोटक कंपनीतील मृतांची संख्या २२; गंभीर जखमी असलेल्या दोन महिला कर्मचाऱ्यांचा मृत्यू..

नागपूर :-जिल्ह्याच्या काटोल तालुक्यातील राऊळगाव येथील एसबीएल एनर्जी लिमिटेड या स्फोटक निर्मिती कंपनीत रविवार,१ मार्च रोजी झालेल्या भीषण स्फोटात गंभीर जखमी असलेल्या आणखी दोन महिला कर्मचाऱ्यांचा उपचारादरम्यान मृत्यू झाला आहे. आम्रपाली अनिल काळसर्पे वय ३८ वर्षे व रोशनी सूर्यकांत उमाठे वय २८ वर्षे यांनी नागपूर येथील रुग्णालयात अखेरचा श्वास घेतला.या दुर्घटनेतील मृतांचा आकडा आता २२ वर पोहोचला आहे.१ मार्च रोजी सकाळी सात ते साडे आठ वाजता कारखान्यातील १६-बी आणि २०-बी नॉनल क्रिम्पिंग युनिटमध्ये जोरदार स्फोट झाला होता.त्यामुळे परिसरात एकच खळबळ उडाली होती.या दुर्घटनेत आतापर्यंत २० महिला आणि २ पुरुष कामगारांचा मृत्यू झाला आहे.तर २० हून अधिक कामगार भाजून जखमी झाले आहेत.त्यांच्यावर नागपूरमधील विविध रुग्णालयांत उपचार सुरू आहेत.या घटनेनंतर स्फोटक उद्योगातील सुरक्षा व्यवस्थेबाबत गंभीर प्रश्न उपस्थित झाले आहेत.स्थानिक आमदार चरणसिंह ठाकूर यांनी विधानसभेत या प्रकरणाची निष्पक्ष चौकशी करून जबाबदार अधिकाऱ्यांवर कारवाई करण्याची मागणी केली आहे.