बिबट आढळला मृतावस्थेत..!

नागपूर :-जिल्ह्याच्या काटोल तालुक्यातील कोंढाळी-नागपूर महामार्गावरील वनविभागाच्या चमेली उपवनांतर्गत हरदोली शिवारात मंगळवारी बिबट मृतावस्थेत आढळून आला.माहिती मिळताच वनपथकाच्या कर्मचाऱ्यांनी घटनास्थळ गाठून पाहणी केली.पाहणीत बिबट मादी असून,अंदाजे दीड वर्षाची आहे,अशी माहिती प्रभारी वनपरिक्षेत्र अधिकारी फरीद आझमी यांनी दिली.कर्मचाऱ्यांनी मृत बिबट ताब्यात घेऊन शवविच्छेदनासाठी नागपूर शहरातील ट्रान्झिट केअर सेंटरमध्ये पाठविला.वैद्यकीय अधिकारी एलडीओ डॉ.मयूर काटे,डॉ.प्रियल चौरागडे,डॉ.राजेश फुरसुंगे यांनी शवविच्छेदन केले.मृत बिबट्याच्या तोंड आणि पायाला गंभीर जखमा आढळून आल्याने तिचा मृत्यू वाहनाच्या धडकेत झाला असावा,अशी शक्यता वनविभागाच्या पशुवैद्यकीय अधिकाऱ्यांनी वर्तविली आहे.बिबट्यावर वनविभागाच्या नियमानुसार अंत्यसंस्कार केले गेले. महामार्गालगत वन्यप्राण्यांच्या हालचालीमुळे अपघाताचा धोका वाढत असल्याचे उघड झाले आहे.