ट्रकला ओव्हरटेक करतांना पिकअप वाहनाची धडक; तरुणाचा जागीच मृत्यू..

भंडारा :-रियल इस्टेटचे काम करणाऱ्या एका २९ वर्षीय तरुणाचा पिकअप वाहनाच्या धडकेत दुर्दैवी मृत्यू झाल्याची घटना काल शनिवारी सायंकाळच्या सुमारास भंडारा-तुमसर मार्गावरील मोहगाव(देवी)गावाजवळ घडली.दुचाकीने जात असतांना समोर असलेल्या ट्रकला ओव्हरटेक करण्याचा प्रयत्न केला,पण समोरून पिकअप वाहन आल्याने समोरासमोर जोरदार धडक होऊन मृत्यू झाला.दिगंबर तेजलाल तुरकर वय २९ वर्षे,रा.डोंगरगाव, ता.जि.गोंदिया असे अपघातात मृत पावलेल्या तरुणाचे नाव आहे.

दिगंबर तुरकर हा नागपुरातील एका कंपनीशी  संबंधित रियल इस्टेटचे काम करायचा.कामानिमित्त भंडारा जिल्ह्यात आला होता.येथील कामे आटोपून तो नागपूरला निघण्याच्या बेतात होता.दरम्यान,काल शनिवारी एमएच ३१ जीबी ५३७३ क्रमांकाच्या दुचाकीने तुमसरकडून भंडाऱ्याकडे जात असतांना मोहगाव(देवी) गावाजवळील मार्गावर पुढे ट्रक असल्याने ट्रकच्या पुढे जाण्याच्या तयारीत असतांनाच समोरून येणाऱ्या पिकअप वाहनाला दुचाकी जाऊन धडकली.धडक इतकी भीषण होती की,दुचाकीचा चेंदामेंदा होऊन दिगंबरचा जागीच मृत्यू झाला.अपघाताची माहिती मिळताच वरठीचे पीएसआय मस्के पोलीस पथकासह घटनास्थळी दाखल झाले.घटनास्थळाचा पंचनामा करून मृतदेह शवविच्छेदनासाठी रुग्णालयात पाठविला.घटनेने तुरकर कुटुंबियांवर दुःखाचे डोंगर कोसळले आहे.