अवैध दारूसाठा प्रकरणी उत्पादन शुल्क विभागाची मोठी कारवाई; पाच लाखाच्यावर दारूसाठा जप्त..

ब्रम्हपुरी(चंद्रपूर):-स्थानिक स्वराज्य संस्थांच्या निवडणुकांची रणधुमाळी सुरू असतांनाच अवैध दारूसाठा प्रकरणी उत्पादन शुल्क विभागाने मोठी कारवाई करत ब्रम्हपुरी तालुक्याच्या उदापूर येथून एकास अटक करून तब्बल ५ लाख १६ हजार २८० रुपयांचा देशी,विदेशी दारूचा साठा जप्त केला आहे.यात विदेशी दारू- दोन लिटर क्षमतेच्या ११ बॉटल,१८० मिली क्षमतेच्या १ हजार ९२७ बॉटल,९० मिली क्षमतेच्या २२५ बॉटल तर देशी दारूच्या ९० मिली क्षमतेच्या २०० बॉटलचा समावेश आहे.अवैध दारूसाठा प्रकरणी उदापूर येथील ज्ञानेश्वर रामकृष्ण नाकतोडे यास ताब्यात घेण्यात आले आहे.

सध्या नगरपरिषद व नगरपंचायतीच्या निवडणुका सुरू आहेत.१ डिसेंबर पर्यंत प्रचार सुरू असणार आहे आणि नंतर दुसऱ्याच दिवशी मतदान पार पडणार आहे. अश्यातच काही ठिकाणी तळीरामांसाठी खास मेजवानी म्हणून देशी-विदेशी दारूची तजवीज करून ठेवली जात आहे.पण,चंद्रपूर जिल्हाधिकाऱ्यांनी १ डिसेंबर ते ३ डिसेंबर पर्यंत संपूर्ण जिल्ह्यात अवैध दारू बंदी लागू केली आहे.त्यातच ब्रम्हपुरी तालुक्याच्या उदापूर येथे अवैध दारूसाठा असल्याची गोपनीय माहिती राज्य उत्पादन शुल्क विभाग नागपूर व राज्य उत्पादन शुल्क विभाग चंद्रपूरच्या पथकास मिळताच धाडसत्र राबविले. यात काल शुक्रवारी सायंकाळच्या सुमारास पथकाने आरोपीच्या घरी छापा टाकला असता मोठ्या प्रमाणात अवैध दारूसाठा आढळून आला.सदरची कारवाई नागपूर राज्य उत्पादन शुल्क विभागाचे विभागीय उपायुक्त गणेश पाटील व चंद्रपूर राज्य उत्पादन शुल्क विभागाचे अधीक्षक नितीन धार्मिक यांच्या मार्गदर्शनाखाली दुय्यम निरीक्षक सोमेश्वर गव्हारे यांच्या नेतृत्वाखाली पथकातील सुजित चिकाटे,संजय कुमार हरिणखेडे,सुकेशनी कारेकार यांनी केली.