वाघाने घेतला शेतकऱ्याच्या नरडीचा घोट; ब्रम्हपुरी तालुक्यातील घटना..

चंद्रपूर :-जिल्ह्याच्या ब्रम्हपुरी तालुक्यातील एका ६० वर्षीय शेतकऱ्याचा वाघाने नरडीचा घोट घेत ठार केल्याची धक्कादायक घटना आज,सोमवार १० नोव्हेंबर रोजी मेंडकी गावनजिकच्या जवराबोडी मेंढा जंगल परिसरात उघडकीस आली.भास्कर गोविंदा गजभिये वय ६० वर्षे रा.मेंडकी,ता.ब्रम्हपुरी,जि.चंद्रपूर असे वाघाच्या हल्ल्यात ठार झालेल्या शेतकऱ्याचे नाव असून भास्कर हे काल रविवारी शेतातील धानाचे भारे बांधण्यासाठी मेंडकीपासून जवळ असलेल्या जवराबोडी-मेंढा जंगल परिसरात सिंदी तोडण्यासाठी एकटेच गेले होते. कालपासून त्यांचा कुठेही थांगपत्ता लागलेला नसल्याने कुटूंबीय तसेच ग्रामस्थांनी वन विभागास माहिती देत शोध घेतला असता आज सोमवारी भास्कर यांचा मृतदेह जंगल परिसरात आढळून आला.प्रकरणी वनविभागाचे अधिकारी व पोलिसांनी घटनास्थळ गाठून पंचनामा करून मृतदेह उत्तरीय तपासणीसाठी ब्रम्हपुरी रुग्णालयात पाठवला.घटनेने परिसरात भीती पसरली असून वाघाचा तात्काळ बंदोबस्त करण्याची मागणी ग्रामस्थांनी केली आहे.