सोनोग्राफी सेंटरमध्ये बालविवाहाचे बिंग फुटले; अल्पवयीन मुलगी गर्भवती.. – सहा जणांवर गुन्हे दाखल..

नागपूर :-वयाची खात्री न करता एका मध्यस्थीच्या मार्फतीने अल्पवयीन मुलीचे लग्न लावून देण्यात आले. विवाह पश्चात अल्पवयीन मुलगी पतीकडे राहू लागली. अश्यातच गर्भवती राहिल्याने पतीने तिला तपासणीकरिता सोनोग्राफी सेंटरमध्ये नेले.तपासणी करीत असतांना मुलीच्या वयाबाबत डॉक्टरला शंका आली.त्यानुसार आधारकार्ड तपासले असता आधारकार्डवरून मुलगी ही केवळ १७ वर्षे १० महिन्यांची असल्याचे डॉक्टरच्या लक्षात आले आणि बालविवाहाचे बिंग फुटल्याची धक्कादायक घटना उमरेड येथील सोनोग्राफी सेंटरमध्ये उघडकीस आली असून प्रकरणी भिवापूर पोलिस ठाण्यात पती,मुलाचे आई-वडील,मुलीचे आई-वडील व एका मध्यस्थीवर पोलिस उपनिरीक्षक अशोक ठाकूर यांच्या तक्रारीवरून बालविवाह प्रतिबंध अधिनियम २००६ सहकलम ४,८,१२ व पोस्कोअंतर्गत गुन्हा नोंदवून आरोपी पतीस अटक करण्यात आली आहे,तर उर्वरित आरोपींचा शोध घेऊन अटक करण्याची प्रक्रिया सुरू असल्याचे पोलीस निरीक्षक जयप्रकाश निर्मल यांनी म्हटले आहे.पीडित अल्पवयीन मुलगी तपासणी अंती १९ आठवड्यांची गर्भवती असल्याचे उघड झाले आहे.

मुलगा नागपूर जिल्ह्याच्या भिवापूर तालुक्यातील असून पीडित अल्पवयीन मुलगी ही चंद्रपूर जिल्ह्यातील रहिवासी आहे.६ एप्रिल २०२५ रोजी पीडित मुलगी १७ वर्षे वयाची असतांना एका मध्यस्थीमार्फत आईवडिलांनी तिचा विवाह भिवापूर तालुक्यातील मुलाशी लावून दिला. विवाहापश्चात अल्पवयीन मुलगी पतीकडे राहू लागली. गत दोन दिवसांपूर्वी पतीने तिला उमरेड येथील सोनोग्राफी सेंटरमध्ये तपासणीकरिता नेले.दरम्यान, आधारकार्डवरून पीडित मुलगी ही १७ वर्षे १० महिन्यांची असल्याचे डॉक्टरच्या लक्षात आले.तपासणी केली असता ती १९ आठवड्यांची गर्भवती असल्याचे समोर आले.डॉक्टरांनी लागलीच याबाबत भिवापूर पोलिसांना कळविले.दरम्यान,पोलीस निरीक्षक जयप्रकाश निर्मल यांनी महिला पोलिस कर्मचाऱ्यामार्फत पीडित मुलीला विश्वासात घेऊन विचारपूस केली असता बालविवाह पश्चात गर्भवती असल्याचे स्पष्ट झाले.